O CESGA renova a súa infraestrutura de servizos cloud para os equipos científicos
venres, 25 de xuño do 2021
O
CESGA
vén de informar dunha relevante renovación da súa infraestrutura
de servizos cloud para investigación e innovación.
O proceso incluíu a posta en funcionamento dun novo clúster adicado
a servizos de cómputo distribuído que, xunto co resto dos recursos
postos en xogo, permitirá ao Centro de Supercomputación de Galicia
incrementar a súa participación nas grandes colaboracións europeas
nesta área.
O
novo clúster amplía complementa a infraestrutura xa en servizo e
faino achegando en total 6.240 núcleos de proceso, unha memoria
agregada de 24 TB e unha capacidade de almacenamento de 3 PB.
En
concreto trátase dun conxunto de 114 nodos de computación con 48
núcleos de proceso, 192 GB de memoria e 960 GB de disco en cada
nodo. A maiores, proporciona 16 nodos de almacenamento con 48 núcleos
de proceso, 192 GB de memoria e 193 TB de almacenamento en cada un
destes nodos.
Segundo
informan fontes do CESGA, “esta ampliación da infraestrutura
permitirá atender as demandas crecentes da comunidade científica,
de modo especial aquelas que requiren cálculos de alta
produtividade, os cales poden facilmente ser distribuídos entre
todos estes nodos”. Deste xeito, os usuarios do CESGA
beneficiaranse da existencia desta infraestrutura “sen ter que
realizar cambios nos seus procesos, posto que unha boa parte da mesma
incorporarase nunha contorna de cálculo común co supercomputador
FinisTerrae”. Os grupos usuarios tamén poderán levantar a
demanda clústeres virtuais con maior cantidade de recursos
computacionais segundo os precisen.
O
CESGA explica que esta fórmula de uso “é moi apreciada polos
equipos de investigación científica”, xa que poden delegar
traballos custosos dende o punto de vista computacional en máquinas
despregadas no Cloud-HPC-CESGA e manter os seus equipos locais
operativos para outros traballos simultaneamente.
A
adquisición deste equipo foi posíbel grazas a financiamento
finalista para investigación achegada polo Fondo Europeo de
Desenvolvemento Rexional (FEDER), polo Ministerio de Ciencia e
Innovación (MICIN), así como polos patróns da Fundación CESGA, a
Xunta de Galicia e o Consello Superior de Investigacións Científicas
(CSIC).