O COETG e a AETG celebran o Día Mundial das Telecomunicacións e da Sociedade da Información 2012 cun amplo abano de actividades
venres, 11 de maio do 2012
O vindeiro 17 de
maio, Día das Letras Galegas e festivo no noso país, celébrase tamén o Día
Mundial das Telecomunicacións e da Sociedade da Información e o Día de
Internet, dous eventos que o Colexio Oficial de Enxeñeiros de Telecomunicación
de Galicia (COETG) vai conmemorar, sen escatimar folgos, con actos a
desenvolver ata finais de mes.
As actividades
comezan o luns, 14 de maio, cunha xornada sobre Economía do Mar que a entidade organiza en colaboración con Ineo,
en Vigo.
O Colexio reserva
o martes para levar a cabo o seu Acto Institucional coa Xunta de Galicia, e o
mércores para celebrar unha conferencia sobre modelos de comunicación actuais,
organizada pola Escola de Enxeñería de Telecomunicación de Vigo, que trae como
relator convidado ao profesor Mike Devetsikiotis, da North Carolina State
University.
O día grande dos
actos de celebración chega o xoves, coa publicación do Manifesto do Colexio
Oficial de Enxeñeiros de Telecomunicación de Galicia e unha nova entrega da
revista A nosa Rede, cun especial DMTSI 2012, dispoñible de balde na web da AETG.
O xoves seguinte,
o 24 de maio, o COETG organizará unha visita
ás instalacións de telecomunicacións do Aeroporto de Santiago de Compostela,
para os colexiados e/ou asociados que estean interesados en coñecer de primeira
man esta infraestrutura “clave”,
segundo din, “para o desenvolvemento
económico e social de Galicia”.
E xa como colofón
a esta festa, o vindeiro venres, día 1 de xuño, a entidade celebra o seu tradicional
Concerto das Telecomunicacións e da Sociedade da Información na Coruña, que vai
xa pola V edición.