O CPEIG celebra o 16 de xuño a novena edición da Noite da Enxeñaría en Informática de Galicia
martes, 30 de maio do 2017
Se
queríamos falar de novas tecnoloxías, por moitos e variados motivos
(porque son xa parte da nosa vida, porque con elas podemos camiñar
cara a un mundo mellor e mesmo emendar e corrixir boa parte das
problemáticas sociais, ambientais e económicas que sofre o mundo),
imos ter oportunidade de facelo, e o Colexio
Profesional de Enxeñaría en Informática de Galicia, vaise
preocupar de achegárnola. Falamos da Noite da Enxeñaría en
Informática de Galicia, que xa vai pola súa novena edición e que
este ano ano celébrase o 16 de xuño, novamente en Compostela e
novamente acompañada dunha manchea de premios para recoñecer o
traballo ben feito dos nosos profesionais en materia dixital.
Trátase,
en palabras do CPEIG, do evento TI referente de Galicia (unha
faceta que se reforza coa celebración dos dez anos de andaina do
CPEIG). Isto que significa?
Pois basicamente unha chea de cousas, pero podemos comezar co
seguinte: significa a gran festa do noso desenvolvemento en materia
comunicativa, empresarial, económica, social, cultural, sanitaria,
medioambiental ou xurídica. Alguén dubida aínda a estas alturas de
que as novas tecnoloxías o abranguen todo?
Toda
a información sobre este evento informático podemos velo xa na web
específica anoite.gal. Celebrarase
unha vez máis no Hotel Monumento San Francisco, en Compostela, e nel
participará novamente unha notábel representación do noso
empresariado, dos nosos profesionais e das/os colexiadas/as da
devandita entidade profesional. O mestre de cerimonias será o actor
e humorista Xosé Touriñán, e está previsto o arrinque da gala
arredor das 20.00 horas, co cóctel de benvida. De seguido, arredor
das 21.00 horas, procederase a entregar os premios que cada ano
convoca o CPEIG e que, como dixemos, diríxense a
mostrar
os esforzos das nosas entidades, asociacións, profesionais e
empresas no camiño de impulsar recursos e servizos tecnolóxicos de
especial valor para o noso desenvolvemento social e económico
(facendo fincapé, tamén, nas iniciativas, nos proxectos e nos
persoeiros que máis e mellor tiveran
impulsado e mellorado a profesión da Enxeñaría en Informática na
nosa terra). A Noite, trala cea de gala, rematará coa actuación do
lendario mago Juan Tamariz.
Os
premios,
na súa totalidade, son os
seguintes: Premio Traxectoria Profesional (a
Andrés Xavier García-Rodeja Fraga, director do Centro de Excelencia
en Intelixencia de Negocio de DXC Technology en Galicia),
Premio Iniciativa Emprendedora (ás
empresas Linknovate
e Situm),
Premio Proxecto Fin de Carreira, Premio Iniciativa de Administración
(á
Deputación
de Ourense, pola súa iniciativa Ourense Provincia Intelixente),
Premio Iniciativa Empresarial (á
entidade financeira galega ABANCA),
Premio Colexiado de Honra e o Premio Ada Byron (a
María José Talavera),
dirixido este último a mulleres enxeñeiras en Informática, líderes
na adopción da tecnoloxía e, segundo se fai saber nas bases do
galardón, “con capacidade para mesturar coñecementos técnicos e
visión social”.
- Foto de familia da edición do ano pasado da Noite do CPEIG
A
maiores, igual có ano pasado, convocouse o Premio Iniciativa
eInclusión, que irá dar a mans da Cruz Vermella, polo seu servizo
de teleasistencia avanzada para persoas maiores ou dependentes (un
proxecto impulsado pola Cruz Vermella co apoio técnico de Televés).
Ademais,
outorgarase o Premio 10 anos conectad@s a distintas entidades
e persoas que ao longo desta década de vida do CPEIG amosaron o seu
compromiso coas iniciativas do colexio e da Enxeñaría en
Informática.
A
entrega destes premios realizarase o día 16 de xuño
en Santiago de Compostela, no Hotel Monumento San Francisco,
no marco dunha cea de gala á que están convidados diversos
persoeiros da vida pública e empresarial galega, aos que cómpre
engadir representantes dos nosos ámbitos académico e investigador.
A previsión é xuntar a máis de douscentos colexiados/as, xunto con
outros convidados/as.
En
palabras da entidade profesional que preside Fernando Suárez, a
Noite da Enxeñaría en Informática de Galicia é “un
acto de exaltación do sector e da profesión” e, tamén,
“unha gala consolidada mediante a cal o CPEIG visualiza a súa
presenza na sociedade galega, o traballo desenvolvido polos
enxeñeiros en Informática dentro da Sociedade da Información e as
iniciativas relacionadas no eido das novas tecnoloxías”. Esta
faceta de salientar o traballo desenvolvido (e festexalo) vaise ver
fortalecida este ano ao coincidir coas celebracións do décimo
aniversario do CPEIG. A Noite, de feito, estase a acompañar neste
2017 dunha longa e completa serie de actos conmemorativos. Por outra
banda, os galardóns que se van entregar na gala do 16 de xuño
serán, en palabras de Fernando Suárez, presidente do CPEIG, un
xeito de agradecer e enxalzar o traballo das
persoas ou entidades que “nos apoiaron ao longo desta década baixo
o lema 10
anos conectad@s”.