O CPEIG distingue as salientábeis traxectorias de Torus Software e Igalia
xoves, 22 de maio do 2014
- O equipo de Torus nunha imaxe de Víctor Echave para a Opinión da Coruña
O Colexio Profesional de
Enxeñaría en Informática de Galicia (CPEIG) segue adiante dando a
coñecer os premios que entregará na súa Noite da Enxeñaría en
Informática de Galicia, programada para o vindeiro 13 de xuño. Se
hai uns días falamos do recoñecemento da plataforma `profesional a
TADEGa, por unha banda, e a
Domingo Molina e Jacinto Canales, pola outra, agora é a quenda
das empresas tecnolóxicas galegas Torus
Software Solutions (Torusware) e Igalia,
que recibirán na dita celebración os premios Iniciativa
Emprendedora e Iniciativa Empresarial, respectivamente, concedidos
polo Colexio Profesional de Enxeñaría en Informática de Galicia.
Segundo fai saber o
CPEIG, “ambas as dúas empresas, con sede na Coruña, representan
dous casos de éxito promovidos por enxeñeiros en Informática”.
Torusware, elixida como mellor iniciativa emprendedora polos
colexiados a través dunha enquisa no portal do CPEIG, constituíse
en 2013. “Esta spin-off da Universidade da Coruña”,
explican os enxeñeiros galegos, “naceu para a comercialización
dun conxunto de tecnoloxías desenvolvidas polo grupo de
investigación do Grupo de Arquitectura de Informática nos últimos
10 anos”. A compañía, engaden, desenvolve e comercializa
solucións de software para reducir os tempos e maximizar resultados
de negocio a través da computación de alto rendemento, centros de
datos empresariais, web 2.0, a nube, o almacenamento e os servizos
financeiros.
As principais áreas de
aplicación son a informática, a enerxía, a I+D, a defensa e os
servizos financeiros, en contornas nas que o tempo de resposta ou o
custo de funcionamento da infraestrutura é un elemento crítico no
sistema de información. A firma foi posta en marcha por Guillermo
López e Ramón Coallo, co apoio do Fondo de Ciencia da Fundación
Barrié.
“Cómpre sinalar”,
explica o CPEIG, “que Torusware conta no seu equipo con dous
enxeñeiros en Informática que mereceron o recoñecemento do CPEIG
polos seus proxectos Fin de Carreira”. Por unha banda Daniel
Fernández, premiado en 2011, e pola outra Roberto Rey, galardoado en
2010. O premio Iniciativa Emprendedora do CPEIG súmase “aos
numerosos recoñecementos obtidos por esta compañía na súa curta
traxectoria”, como son o de Mellor Empresa de Base Tecnolóxica no
certame da USC ou o último Venture Network Vertical, do IE Business
School. Por outra banda, tamén
recibiu o ano pasado unha importante distinción da Embaixada
Británica, como sinalamos dende Código Cero.
- O equipo da firma galega Igalia
Polo que atinxe a Igalia,
sinalar que foi posta en marcha en 2001 na Coruña da man de dez
enxeñeiros en Informática. A súa idea común foi a de “crear
unha empresa baseada na cooperación, a innovación, a
responsabilidade compartida e o software libre”. Arestora a firme
ten un equipo de 40 persoas que traballan desde oficinas de diversas
cidades de España e doutros países, como os Estados Unidos, Corea,
Finlandia e Suíza, ofrecéndolles os seus servizos a clientes de
todo o mundo”.
O CPEIG lembra que “tras
comezar como empresa especializada en plataformas de software libre,
Igalia soubo adaptarse ás necesidades do mercado e, hai tres anos,
orientou o seu negocio ao desenvolvemento dos motores web Webkite e
Blink, que se usan como base dos navegadores Safari e Google Crome;
isto permitiulles converterse na primeira empresa consultora
independente para servizos de mellora do navegador, cun volume de
vendas anual que rolda os dous millóns de euros”. Os enxeñeiros
en Informática tamén salienta a aposta de Igalia pola
Responsabilidade Social Corporativa, cun investimento do 0,7% da súa
facturación en distintas ONG (compromiso
solidario do que tamén falamos en detalle dende Código Cero) e
a creación do Premio Fin de Carreira en Software Libre. Ademais,
forma parte da Asociación Galega de Software Libre (AGASOL) e de
fundacións internacionais como Linux Fundation, Gnome, Genivi e W3C.