O Centro Tecnolóxico Gradiant, na directiva de RENIC
luns, 12 de setembro do 2016
O Centro Tecnolóxico
Gradiant, centro exemplar a nivel estatal e internacional en materia
de tecnoloxías para salvagardar información e comunicación,
atópase entre as entidades impulsoras e fundadoras da RENIC,
que é como se coñece a Rede de Excelencia Nacional de Innovación
en Ciberseguridade. Gradiant,
ademais, é membro da directiva deste tecido investigador.
Segundo nos conta o centro galego, RENIC é unha asociación
sectorial que engloba centros de investigación e outros axentes do
ecosistema de I+D en ciberseguridade de España.
O seu obxectivo principal
é o de “fomentar o estudo científico, o desenvolvemento
tecnolóxico, a innovación, a transferencia de coñecemento e
tecnoloxía á industria e o desenvolvemento de proxectos de I+D+i no
sector da ciberseguridade en España”.
A maiores, a principal
razón de ser de RENIC é contribuír unha meirande competitividade
nas pescudas en materia de protección de datos e comunicacións,
“buscando a creación de solucións que mitiguen os riscos e
ameazas emerxentes, dando resposta a necesidades do mercado”. Para
iso, poténciase a coordinación e a cooperación activa a través de
iniciativas que permitan explotar as capacidades do ecosistema
investigador en ciberseguridade de forma colaborativa, sinerxética e
conxunta”.
O seu reto concreto é
emprazar o ecosistema estatal de I+D dentro da area global como “un
ecosistema competitivo”, con altos niveis de transferencia e
valorización tecnolóxica e cun alto grao de colaboración e
conexión entre os seus axentes.