O Cesga imparte en Lugo un obradoiro de aprendizaxe en Rede

A Área de e-learning do Centro de Supercomputación de Galicia (Cesga) vén de anunciar que participará este venres 30 nas xornadas sobre plataformas web de software libre para organizacións da sociedade civil que organiza a Vicerreitoría de Coordinación do Campus de Lugo en colaboración coa Aula TIC Pemes da Universidade de Santiago de Compostela e a Concellaría de Servizos Xerais do Concello de Lugo.
Estas xornadas teñen como obxectivo amosar a ampla variedade de plataformas web de código aberto de utilidade para mellorar a presenza na Rede así como a difusión de actividades, a xestión da aprendizaxe e o coñecemento, a creación de secretarías virtuais e a organización de e-comunidades sociais.
En concreto, o obradoiro no que participará a devandita área de e-learning do Cesga versará sobre o emprego do sistema de xestión da aprendizaxe Dokeos.
As xornadas deron comezo o pasado 29 de novembro e estenderanse ata o vindeiro día 1 de decembro no Campus de Lugo.