O CiTIUS impulsa un proxecto para facilitar con gaming a formación en riscos laborais
xoves, 22 de decembro do 2022
O
CiTIUS, centro de Intelixencia Artificial da USC, presentou os
detalles dun proxecto que busca facilitar a formación de
traballadores industriais con técnicas de gaming e Realidade
Aumentada. Trátase do proxecto DITMEP,
no que participa o centro compostelán xunto con socios de 3 países
da Unión Europea, cuxo obxectivo concreto é “mellorar a
aprendizaxe non presencial en Prevención de Riscos Laborais (PRL)”.
Está financiado polo programa ERASMUS+ da CE e está previsto que
remate en abril de 2023, achegando recursos de valor para a
transformación das metodoloxías formativas do persoal en fábricas,
“en resposta ás necesidades xeradas pola pandemia”.
Máis
polo miúdo, os seus obxectivos específicos son “xerar novas
capacidades dixitais nas metodoloxías para formadores e alumnos en
contornas industriais a través da aprendizaxe a distancia
(elearning), a
gamificación e as experiencias de Realidade Aumentada”.
DITMEP
(Digital Tools for Manufacturing training and Education
Programmes) arrincou en 2021, nun contexto pandémico no que a
“dixitalización converteuse en algo extremadamente importante e
que supuxo unha motivación extra entre tódolos socios”, sinalan
fontes do consorcio, engadindo que “as ferramentas dixitais
desenvolvidas axudarán a seguir ofrecendo unha formación de alta
calidade no futuro”.
Concretamente,
no último trimestre de 2022 os desenvolvementos realizados en DITMEP
deron como froito unha proba piloto desenvolvida nas instalacións
dun dos socios do proxecto, o Centro Tecnolóxico do Mar (CETMAR).
Nela, despregouse un curso online de riscos laborais en
contornas manufactureiras, usando distintas técnicas de elearning
para promover a aprendizaxe: por unha banda, empregáronse técnicas
de gamificación e pola outra
incluíronse tamén dúas aplicacións de Realidade Aumentada
que ofreceron unha maior flexibilidade e facilitaron a formación ao
interactuar con elementos de sinalización en contornas industriais,
así como na selección de equipos de protección persoal (EPIs). Os
resultados desta proba piloto serviron para “refinar os contidos do
curso e o funcionamento das aplicacións de RA, incrementado así a
calidade dos produtos xerados no marco de DITMEP”, explican os
responsábeis do proxecto.
Esta
primeira proba piloto é só un dos cursos mixtos que se
desenvolverán antes da conclusión de DITMEP, prevista para abril de
2023. Nos vindeiros meses, presentaranse novos cursos mixtos de
prevención de riscos baseados en técnicas dixitais, nos que se
manterá o espírito do primeiro piloto: formato transnacional e unha
educación innovadora e reforzada no ámbito da fabricación de
materiais compostos (composites), que pode ser facilmente
replicada noutros sectores industriais
O
consorcio de DITMEP está composto por 5 socios de 3 países da Unión
Europea: (Alemaña, España e Portugal), e na súa constitución
tívose en conta a necesidade de cubrir os diferentes aspectos do
desenvolvemento destes cursos de formación. Deste xeito, entre os
socios figuran representantes de diversos sectores, como centros de
formación, universidades e empresas certificadoras
Os
resultados finais de DITMEP presentaranse en abril de 2023, ao longo
dunha conferencia final de proxecto que terá lugar en Hamburgo.