O Concello de Ames pon en marcha o laboratorio Ames AV Lab
xoves, 23 de febreiro do 2023
O
alcalde de Ames, Blas García, e mailo presidente da Deputación da
Coruña, Valentín González Formoso, visitaron este 22 de febreiro o
Espazo Colaborativo A Proa, no Milladoiro, para
presentar ás principais empresas do sector o proxecto Ames AV Lab,
un laboratorio de aceleración de proxectos audiovisuais co que se
pretender “impulsar a produción, fomentar o talento emerxente e
dinamizar o importante tecido produtivo do sector audiovisual no
municipio”.
No
acto participaron tamén a concelleira de Promoción Económica, Ana
Belén Paz, e a técnica municipal María Lloves. Asistiron ao evento
varios concelleiros e concelleiras da Corporación municipal así
como outros/as técnicos do Concello e da Deputación.
Financiamento
de 200.000 euros
O
proxecto Ames AV Lab conta cun financiamento de 200.000 euros, dos
que 160.000 euros, o 80% do financiamento, son achegados pola
Deputación da Coruña, e o 20% restante por parte do Concello de
Ames.
Na
presentación María Lloves, técnica do departamento de Promoción
Económica, foi a encargada de explicar as distintas fases que
atravesarán os proxectos que sexan seleccionados para participar no
Ames Lab, así como que se lle dará prioridade “ás persoas mozas
e ás mulleres, para tratar de diminuír a fenda xeracional e de
xénero que existe no noso territorio”.
O
presidente da Deputación da Coruña, Valentín González Formoso,
destacou a importancia de “dotar de ferramentas ao talento propio
para que radique en Galicia, de xeito que permita ilusionar aos nosos
creadores e creadoras do eido do audiovisual e isto se acabe
traducindo na creación de empregos”. O presidente indicou que
“desde a Deputación da Coruña apoiamos o desenvolvemento deste
coworking A Proa, un dos 11 da Rede Provincial de Espazos de
Traballo Colaborativo que na actualidade xa alberga a 30
emprendedoras e emprendedores que están a facer realidade as súas
ideas aquí, no Concello de Ames”.
Pola
súa banda, Blas García sinalou que “hai ano e medio,
aproximadamente, estabamos inaugurando este espazo coworking
para apoiar aos sectores da innovación e do audiovisual. Xa temos
trinta proxectos que están aquí instalados, comezando a
desenvolverse. Un dos labores máis importantes das administracións
é axudar ás persoas que teñen inquedanzas, ao talento que temos
nos nosos concellos, e que poidan traballar e poñer en marcha os
seus proxectos. Sempre apostamos pola formación. Temos un centro en
Aldea Nova, estamos creando un centro multifuncional, e dispoñemos
deste espazo colaborativo A Proa, que tamén queremos poñer en
valor”.
O
laboratorio Ames Av Lab
O
Concello, grazas ao apoio económico da Coruña, ten previsto poñer
en marcha o proxecto audiovisual Ames Audiovisual Lab, que se concibe
como un laboratorio de aceleración de proxectos audiovisuais, que
busca impulsar a produción, o fomento do talento emerxente e a
dinamización do tecido produtivo da provincia. “É un laboratorio
que tratará de apuntalar o talento que o audiovisual xa ten
conformado, e axudando a crear unha nova xeración de persoas que
traballen no audiovisual con vocación innovadora”, explicaron,
engadindo que un dos principais cometidos da iniciativa será atraer
proxectos que non estean iniciados, e que non teñan data de inicio
de rodaxe prevista (curtas, longametraxes, series, narrativas
inmersivas, realidade virtual...). Amais, “fomentarase a
participación de proxectos que contribúan á incorporación laboral
de persoas mozas e mulleres, tratando así de diminuír a fenda
xeracional e de xénero que existe no noso territorio”, sinalaron.
As
instalacións da Proa serán empregadas como “sede principal”, e
búscase ofrecer unha tecnoloxía innovadora que permita planificar a
postprodución dende que os proxectos boten a andar, así como que
sexa posíbel facer medicións de audiencia para coñecer as
demandas do consumidor. O laboratorio busca tamén que todas as
iniciativas que se creen na Proa traballen conxuntamente, de maneira
que se creen sinerxias e crezan os proxectos.
No
mes de marzo realizarase unha convocatoria para seleccionar 15
iniciativas, que recibirán cobertura de asesoramento por parte de
expertos do audiovisual; así como formación, na Ames Audiovisual
School, onde se impartirán nocións de diferentes sectores que
abranguen todas as partes dos proxectos a desenvolver: creación,
produción, postprodución, financiamento, marketing,
distribución e dereitos de propiedade intelectual. Así mesmo, tamén
se programarán distintos obradoiros sobre temas que demanden os
creadores das iniciativas seleccionadas.
No
ecuador do proxecto, arredor dos meses de verán, sacarase unha
convocatoria de bolsas. Das 15 iniciativas presentadas, serán
seleccionadas 7, que xa se atoparán en fase de maduración, e que
recibirán unha axuda de 10.000 euros. De xeito paralelo, estarán
realizándose no Ames Lab actividades de networking e de
formación. A maiores, realizarase o Ames Audiovisual Showcase, unha
presentación final de todos os proxectos apoiados, na que se
mostrará o traballo realizado a festivais, empresas produtoras,
distribuidoras, representantes de mercados... etc.