O Concello de Pontevedra convida ós grafistas a participar na creación Fondo Documental do Deseño Galego
martes, 2 de xaneiro do 2007
Os internautas galegos vinculados ó deseño e á comunicación social
teñen moitas opcións estes días de atopar nas súas contas de correo electrónico
unha tarxeta virtual que os convide a participar no Fondo Documental do Deseño Galego,
unha proposta do Concello de Pontevedra enmarcada no programa Interreg II.
Esta iniciativa, se cadra unha das máis salientables dende o punto de vista
artístico da tempada (tratándose como se trata dunha proposta institucional),
tamén inclúe a organización de dúas interesantes mostras, chamadas Deseña Galiza e Icono Galiza, que se celebrarán ó longo do mes de marzo deste ano
no casco antigo da cidade do Lérez.
Un dos puntos fortes da devandita proposta para constituír o Fondo Documental
do Deseño Galego ten que ver coas súas estreitas ligazóns co virtual. É dicir:
os responsables do proxecto animan ós internautas a presentar os seus traballos
creativos a través da páxina web habilitada con este fin, cooperando deste
xeito “na posta en valor do deseño como
parte da cultura contemporánea”.
Cómpre sinalar que a participación é libre, así como a retirada. O abano de
categorías é amplo entre un extremo e outro: deseño editorial, publicitario, de
difusión cultural e xornalístico, imaxe corporativa para empresas, institucións
ou actividades de difusión cultural, marcas de alimentación, packaging, marcas téxtiles, ilustracións
(infantil, humorística ou publicitaria), sinalética, produtos senlleiros,
fotografía publicitaria, xornalística ou de reportaxe e infografía.