O Executivo aproba un plan de acción para a liberalización do dividendo dixital
venres, 18 de novembro do 2011
O Consello de
Ministros aprobou este venres o regulamento que fixa as accións a levar a cabo
para liberar as frecuencias radioeléctricas do dividendo dixital. O obxectivo é
posibilitar que poidan ser empregadas polos operadores de telecomunicacións
para achegar “servizos avanzados de
comunicacións electrónicas”, informa
o Goberno. Seguindo este fío, o Executivo lembra que o pasado 3 de abril de
2010 completouse “con éxito” a
transición á Televisión Dixital Terrestre co cese definitivo das emisións en
analóxico, encamiñándose as devanditas actuacións de dividendo dixital a
tirarlle partido ao servizo de TDT na banda frecuencias de 470 a 790 MHz.
Isto significaría
que a subbanda de frecuencias de 790 a 862 MHz (canles radioeléctricas 61 a 69)
onde arestora se presta o devandito, fique reservada para o subministro de
recursos de comunicacións electrónicas de índole paneuropea. “Deste xeito”,
engade o Goberno, “as bandas que constitúen
o dividendo dixital dedicaranse a servizos claves para a recuperación económica,
como os servizos de banda larga”. E apunta: “Así, a consecución do dividendo dixital e o desenvolvemento de novos
servizos e tecnoloxías nesta banda de frecuencias son fundamentais para acadar
o obxectivo de cobertura de banda larga a 30 Mbps do 100% dos cidadáns antes do
mes de maio de 2020”.
Co Plan aprobado
búscase garantir o mantemento do servizo público de televisión, reducindo o
impacto na cidadanía e nos difusores provocado deste proceso de reordenación paneuropea do espectro radioeléctrico.
