O Goberno anuncia investimentos de 251 millóns de euros para fomentar na nosa terra a enerxía limpa e a conectividade a Internet
venres, 5 de novembro do 2021
O
delegado do Goberno en Galicia, José Miñones, presentou este venres
5 en Vimianzo dúas liñas de investimento do Plan de Recuperación,
Transformación e Resiliencia do Goberno para “apoiar a igualdade
de oportunidades da cidadanía e dos concellos do rural de Galicia”.
En concreto, avanzou acordos que suman 25 millóns de euros para que
os Gobernos locais desenvolvan proxectos de enerxía limpa e para
levar a banda larga de alta velocidade a 90.000 fogares e empresas de
zonas rurais de Galicia que ata agora carecían desta conexión a
Internet.
Miñones
dixo que o obxectivo é “achegar servizos de calidade á poboación
do rural, garantir a cohesión territorial e a igualdade de
oportunidades en todo o territorio”.
O
delegado do Goberno anunciou que este venres 5 o Ministerio para a
Transición Ecolóxica abre o prazo para que os concellos presenten
solicitudes á convocatoria de axudas do programa DUS-5000 de
eficiencia enerxética. “Este programa”, dixo, “xa conta cunha
cantidade preasignada a Galicia de 5,7 millóns de euros que poderán
financiar ata o 100% do total de investimento”. E engadiu: “Desta
volta a convocatoria beneficiará exclusivamente aos municipios do
reto demográfico, que en Galicia son 252 e na provincia da Coruña,
69, entre eles Vimianzo”, engadiu o delegado, aclarando que a
cantidade dispoñíbel poderá ampliarse en función das solicitudes
presentadas.
Respecto
da banda larga, dixo que esta “semana o Ministerio de Asuntos
Económicos e Avance Dixital aprobou proxectos por 30 millóns de
euros para levar a banda larga de alta velocidade a zonas que
carecían deste servizo en 278 concellos de Galicia”.
Trátase,
engadiu, da primeira convocatoria do Plan Unico-Banda Ancha, polo que
o Goberno aporta 19,3 millóns de euros a empresas tecnolóxicas para
financiar as acometidas de Internet en zonas rurais de Galicia. Os
proxectos executaranse o vindeiro ano, co obxectivo de que a
cobertura de redes con velocidade superior a 100 Mbps alcance o 95%
da poboación en 2023.