O Goberno quere que toda Galicia teña banda larga de alta velocidade antes de 2025
mércores, 29 de setembro do 2021
O delegado do Goberno, José Miñones, presentou
hoxe os investimentos do Executivo para o concello de
Carballo, un plan que comparte os obxectivos principais do Estado
para a nosa terra: apostar “por unha Galicia dixital, verde,
inclusiva e igualitaria”. Segundo fixo saber, os investimentos do
Goberno ascenden a 2,1 millóns de euros este mesmo ano. Asemade,
poñendo o foco na folla de ruta galega, remarcou o interese do
Executivo central para cubrir con banda larga a totalidade da nosa
xeografía antes de 2025.
Acompañado pola subdelegada do
Goberno na Coruña, María Rivas, e o alcalde de Carballo, Evencio
Ferrero; o delegado mantivo un encontro de traballo no Consistorio
seguido pola supervisión do proxecto Cicl-Ando Carballo,
que conta con nove sendas peonís e unha rede de aparcabicis.
Respecto
da dixitalización, “un dos grandes piares do Plan de Recuperación,
Transformación e Resiliencia”, sinalou que se está a materializar
en Carballo a través do Plan de Extensión de Banda Larga, impulsado
polo Misterio para Asuntos Económicos e Transformación Dixital.
Esta liña de traballo tradúcese en 55 núcleos de poboación do
rural do dito municipio que se van ver beneficiados do plan PEBA e,
polo tanto, disporán de Internet de alta velocidade nos seus fogares
e empresas.
Obxectivos
para Galicia
Como
dixemos, o obxectivo do Goberno central é alcanzar o 100% de
cobertura de banda larga de alta velocidade en Galicia antes de 2025.
“Isto é clave para a continuidade do rural e garantir a igualdade
de oportunidades da súa poboación”, sinalou Miñones, destacando
que o subministro de redes é “unha das medidas que buscan
dinamizar o rural galego e afrontar o reto demográfico”.
