O INTECO achega consellos de seguridade para usuarios de móbiles ante o medre do malware
martes, 20 de marzo do 2012
Que pasa cando
lle pasa algo ao noso móbil? Segundo a última vaga do Estudo
sobre seguridade en dispositivos móbiles de INTECO, pásalle cada vez máis o
mesmo que lle pasa aos computadores. Así, aínda que o roubo e a perda dos teléfonos
son as incidencias máis habituais declaradas polos usuarios, un 3% confesa ter
sido vítima dunha infección de malware,
e o 6,6% dun caso de fraude. De feito, o malware
para sistemas operativos móbiles creceu un 640% en 2011.
“Ao igual que acontece cos equipos, executar
ou empregar programas que proveñen de fontes dubidosas pode supor un risco de
seguridade”, informa o instituto, e engade como recomendación: “Neste senso, e como bo hábito de seguridade,
un 91,2% dos usuarios de smartphones que se descargan aplicacións no seu
terminal faino dende os acubillos dixitais oficiais”. Pero hai máis medidas preventivas: o emprego
do código PIN (86,9%) para a protección do trebello, realizar copias de
seguridade e sistemas extra de contrasinal trala inactividade (30,8 e 15,5%,
respectivamente) ou anotar o número do IMEI (International Mobile Equipment Identifier). Isto último, sinálase
dende INTECO, posibilita que teñamos identificado o móbil e permítenos o seu
desactivamento remoto ou recoñecemento do mesmo en caso de roubo ou perda.
Neste senso, un 28,5% dos usuarios de telefonía móbil téñeno apuntado.