O ITG desenvolve unha IA para predicir a repercusión das producións audiovisuais
martes, 4 de xullo do 2023
- Óscar González, director da área TIC en ITG
O
Instituto Tecnolóxico de Galicia (ITG) está a desenvolver
aplicacións de Intelixencia Artificial (IA) para axudar a predicir o
comportamento en pantalla das producións audiovisuais. Isto, sinala
o ITG, permitirá ás compañías de creación de contido audiovisual
que empregando tecnoloxías de Big Data (análise de
información a gran escala) e IA, sexan quen de adiantarse ás
necesidades do mercado optimizando os seus procesos de produción.
Óscar
González, director da área TIC en ITG, destaca que “a ferramenta
desenvolvida por ITG permite tratar unha gran cantidade de datos para
determinar patróns e variábeis que inflúen nos hábitos de consumo
audiovisual”.
ITG
farao a través da identificación, a análise e o tratamento
complexo de múltiples datos multisectoriais co obxectivo de adestrar
algoritmos de aprendizaxe automática para obter predicións de
éxito. Así, deseñará e creará unha ferramenta dixital que
incluirá análise e xestión intelixente de datos (Data Fabric)
con información obtida de redes sociais, entre outras fontes, como
as reaccións detectadas ante determinados contidos. Desta forma,
empresas galegas produtoras de contidos audiovisuais como a
Corporación Radio Televisión de Galicia (CRTVG) poderán “realizar
un diagnóstico máis certeiro sobre as posibilidades de que un
produto audiovisual sexa ben acollido pola cidadanía, o que supón
unha maior eficiencia do servizo público”, como sinala José
Pereira, director da área de Innovación e Negocio en CRTVG.
Este
desenvolvemento do ITG permitirá ás empresas produtoras ter unha
análise máis eficiente do previsíbel percorrido de determinados
produtos antes mesmo de acometer investimento na súa produción. Por
unha banda, a partir de datos históricos de audiencia dunha serie
producida, poderase determinar o interese xerado nunha tempada e,
pola outra, ao coñecer os factores clave de éxito na xeración de
contidos para unha contorna acoutada, como é o caso de Galicia,
analizarase e determinará a percepción destes factores noutros
territorios.
“É
unha solución que achegará valor á toma de decisións, permitindo
a automatización dun dos procesos máis complexos na programación
televisiva e unha mellora clara nos procesos de traballo
establecidos”, reflicte José Pereira. A implementación da
ferramenta desenvolvida por ITG supoñerá para a CRTVG “un salto
importante cualitativa e cuantitativamente, tanto nos procesos de
compra de produtos como na programación co obxectivo de acertar cos
gustos do espectador, o que redunda sempre en beneficio tanto do
sector audiovisual como do servizo público”.