O Plan ÚNICO achegou a banda larga a 700 fogares e empresas de Santa Comba
venres, 18 de agosto do 2023
O delegado
do Goberno, Pedro Branco, visitou este venres 18 de agosto o concello
de Santa Comba para supervisar as actuacións do Goberno no
municipio. Foi recibido polo alcalde, Alberto Romar, a quen
felicitou pola súa recente designación como rexedor da vila. Na
reunión salientaron actuacións como a recente substitución
das luminarias do concello, cun investimento do Goberno de algo máis
de 900.000 euros, e na que tamén se incluía a iluminación de
varios pasos de peóns. Amais, puxeron o foco no esforzo do Executivo
central por levar a banda larga aos núcleos de poboación do termo
municipal a través do Programa ÚNICO do Ministerio de Asuntos
Económicos.
A través deste plan, sinalaron, dotouse de
conexión de Internet de alta velocidade a máis de 700 fogares e
negocios do concello de Santa Comba que até o de agora non
gozaban deste servizo. “Falamos de actuacións que permiten
reforzar a nosa aposta polo turismo, pero tamén pola eficiencia
enerxética, a dixitalización e o coidado da nosa contorna”,
destacou o delegado.
Tamén salientaron a inclusión de Santa Comba no
Plan de Sustentabilidade Turística Terras de Santiago que, cun
investimento de 1,3 millóns de euros promove actuacións que buscan
“potenciar os mercados gastronómicos locais, crear e difundir
novos formatos de turismo gastronómico na comarca e reforzar a
oferta de turismo activo coa recuperación do Camiño dos Arrieiros e
sendas de pescadores e agropecuarias”, lembraron.
Xunto a estas actuacións, Santa Comba tamén
recibiu 7.074,32 euros do Plan de Recuperación, Transformación e
Resiliencia do Goberno para un programa de compostaxe doméstica, e
os 13.786,34 euros do Pacto de Estado de contra a Violencia de Xénero
que recibe do Ministerio de Igualdade.
En total, os investimentos do Goberno no municipio
superan os 2 millóns de euros.