O Polígono Virtual de Amoeiro xa acubilla unhas cen iniciativas empresariais
mércores, 19 de febreiro do 2014
O primeiro polígono empresarial virtual de
Galicia, do que falamos en Código Cero o pasado mes de novembro para
falar do seu nacemento e dos seus obxectivos, recibiu importantes
pulos dende a súa posta en marcha. Máis polo miúdo, o
da centena de iniciativas empresariais que xa se adheriron ao
proxecto e desenvolven a través deste acubillo da Rede cadansúas
actividades de mercado. Ademais, a esta listaxe cómpre engadir o
de case cincuenta empresas máis que xa confirmaron que están a
levar a cabo os procesos requiridos para xuntar as súas forzas na
iniciativa. Lembrar que o Polígono
Virtual de Galicia foi posta en marcha da man do Concello de
Amoeiro en colaboración coas empresas Ciolet System e a Corporación
Eurogalega de Negocios.
Segundo sinalaron estes días fontes do goberno
local, unha das cousas máis destacábeis do proxecto, xa unha
realidade dando bos e interesantes froitos, é a diversidade dos seus
integrantes. De feito, hai firmas do eido tecnolóxico, dos servizos,
centradas en actividades agrícolas e outras no ámbito da
hostalaría. En contra do que se pode supor, non se trata
exclusivamente de iniciativas locais, aínda que tamén. Ao tratarse
dun proxecto virtual e precisamente por iso, acolle proxectos de
tódolos recantos da nosa terra e mesmo do resto do Estado. O
polígono virtual, entre
outros servizos, fornece ás firmas e aos emprendedores cuestións
relacionadas cos servizos web (aloxamento, seguridade, etc) e outras
vantaxes relacionadas co asesoramento e co mentoring.
O Polígono Virtual de Amoeiro, lembraremos, tamén achega
acubillos para o domicilio fiscal das súas empresas. O Concello,
segundo
fixo saber a Praza.com o pasado mes de novembro, quere converter
Ameiro nun lugar que xunte tradición e tecnoloxía, chegando a ser
“o primeiro concello 2.0 de Galicia”. E prosegue: “O que
queremos é atraer xente e ofertas servizos a prezos mínimos”.