O Xemelgo Dixital de Smartiago dá forma a un living lab de solucións innovadoras
luns, 21 de novembro do 2022
A
empresa adxudicataria da proposta de Smartiago (o proxecto de Cidade
Intelixente de Santiago) para unha mobilidade sustentábel, Itera
Técnica, rematou a semana pasada as súas actividades en aberto. Así
o confirmou o Concello, que indica que as ditas actividades serviron
entre outras cousas para outorgar o perfil definitivo ao Living
Lab SmartWay, espazo de interacción aberta para o
desenvolvemento de solucións tecnolóxicas innovadoras que comezará
a súa plena actividade en datas vindeiras.
Ás
sesións asistiron representantes de institucións e empresas
privadas relacionadas coa tecnoloxía ou a innovación, así como
persoas cun interese máis persoal no proxecto do Xemelgo Dixital da
iniciativa Smartiago. Durante a súa duración, o público aprendeu a
usar e acceder á plataforma SmartWay e a participar no Living Lab a
través de diferentes roles: usuario, colaborador ou como asistente
ás actividades. A un nivel máis científico explicáronse os pasos
para o modelado do movemento da cidadanía coa ferramenta Pathfinder,
ademais da simulación da mobilidade na cidade de Santiago. As
persoas ou entidades interesadas en coñecer máis en detalle o
Xemelgo Dixital deberán rexistrarse na web para obter datos sobre as
simulacións de mobilidade.
Nun
plano máis concreto, as sesións serviron para que os relatores
explicaran que o obxectivo do proxecto Xemelgo Dixital compostelán é
senta os alicerces “para unha xestión intelixente da mobilidade na
capital galega”. Para isto, realizouse a construción dun modelo
plenamente funcional de Santiago que “representa con razoábel
precisión a realidade, permitindo así simular como se moven as
persoas dentro do espazo físico da cidade”, aclararon os
relatores.
Para
realizar o modelado empregouse o software Pathfinder, de Thunderhead
Engineering, e a linguaxe de programación R para a xeración de
scripts. Dende Itera salientaron que “Pathfinder proporciona
unha interface gráfica para o deseño e execución de simulacións,
así como ferramentas de visualización 2D e 3D para a análise de
resultados”. Tamén fixeron saber que “o modelo final da zona
permite visualizar a simulación nun día concreto a partir de datos
reais obtidos a través de sensores colocados en diferentes puntos,
segundo o día da semana, ou mediante datos elixidos polo usuario”.
Esta ferramenta tamén proporciona información sobre o número de
persoas por rúa e permite definir rexións nas que medir a ocupación
ou pechar rúas virtualmente e analizar os cambios nos fluxos de
desprazamento dos cidadáns modificando parámetros como o número de
viandantes, a súa velocidade ou o tipo de comportamento, engadiron
dende a empresa tecnolóxica.
Na
xornada de capacitación en financiamento abordáronse as diferentes
formas de poñer en marcha o proxecto Xemelgo Dixital ao respecto das
axudas, subvencións ou programas. Ademais, tratáronse diversas
oportunidades para obter financiamento a nivel autonómico,
destacando as axudas promovidas pola Axencia Galega de Innovación
(GAIN), nacional e europea. Neste último caso destacou Horizonte
Europa, o novo programa de investimento en investigación e
innovación da Unión Europea para o período 2021-2027 (o seu
predecesor é o H2020).
Proxecto
Xemelgo
Dentro
da liña de actuación de mobilidade de Smartiago atópase a
iniciativa do Xemelgo Dixital, impulsado pola empresa Itera Técnica,
que versa na creación dun modelo plenamente funcional e o máis
preciso posíbel á realidade que permitirá simular como se moven as
persoas no centro e no centro histórico de Santiago de Compostela.
Para levar a cabo este proxecto substituíronse 22 bancos de
mobiliario urbano en puntos estratéxicos da cidade que, xunto á
aplicación móbil SmartWay Smartiago, permite coñecer os
comportamentos dos peóns.
Este
prototipo de simulación virtual dos fluxos de mobilidade “permitirá
ao Concello de Santiago deseñar novas políticas de actuación ou
prever futuros impactos na contorna urbana como, por exemplo,
posíbeis aglomeracións en determinados eventos”, sinalou o
Concello.