O afianzamento de Internet entre os nosos autónomos sitúase dez puntos por debaixo do das microempresas
martes, 22 de xaneiro do 2013
- Mar Pereira, directora da Axencia para a Modernización Tecnolóxica de Galicia, AMTEGA
Os
novos informes do Observatorio da Sociedade da Información e a
Modernización de Galicia (OSIMGA), pertencente a AMTEGA, sitúan
o afianzamento das novas tecnoloxías da información entre os nosos
autónomos a un nivel básico. Máis polo miúdo, emprázase a
contratación de Rede entre o devandito colectivo dez puntos por
debaixo dos datos que amosan as microempresas. Así figura no informe
A
Sociedade da Información e os autónomos. Edición 2012,
feito polo devandito observatorio da Axencia para a Modernización
Tecnolóxica de Galicia coa colaboración de FEAGA, a Federación de
Autónomos de Galicia. Segundo indicou
AMTEGA na
presentación do estudo (celebrada ante os medios este martes 22),
o informe ten valor engadido por tratarse do primeiro que se fai,
atendendo ás novas tecnoloxías, entre o devandito colectivo
profesional.
Para
darlle forma, fixéronse máis de 500 enquisas. A gran conclusión
que se extrae é que tanto a dispoñibilidade como o emprego de TIC é
“sensiblemente
menor entre estes profesionais que entre as empresas galegas
constituídas como sociedades”.
Cómpre
lembrar que na nosa terra hai 145.245
autónomos cun perfil masculino de entre 40 e 54 anos de idade,
centrados
sobre todo no
sector servizos (57,4%) pero
con
forte presenza na
agricultura (27%). “A
presenza de mulleres entre o colectivo (43,5%) supera en dez puntos
porcentuais á proporción de autónomas do conxunto do Estado
(33,4%)”,
engadiron
na presentación do informe Mar Pereira (directora de AMTEGA) e
Francisco Javier Pérez (presidente de FEAGA), que tamén fixeron
fincapé no feito de que unicamente o
65,3% dos autónomos galegos ten conexión a Internet para a súa
actividade profesional e o 57,4% conta con banda larga, máis de 10
puntos de diferenza por baixo do conxunto das microempresas
sociedades. Porén,
cales son os motivos para que teñamos entre mans estes datos?
Segundo explicaron, estamos máis ante unha situación de opción
persoal que de falta de infraestrutura ou recursos. Así, case a
metade dos nosos autónomos que non teñen Internet deciden non telo
porque non lle ven vantaxes para o seu día a día laboral. Asemade,
un de cada cinco di que non conta co coñecemento preciso para darlle
rendemento.
O
computador
e
a telefonía móbil para uso empresarial son
os equipamentos informáticos con maior presenza entre os autónomos
(73,5% e 60,7%, respectivamente) “pero
cunha significativa fenda con respecto ás sociedades que acada os
14,6 puntos de diferenza en dispoñibilidade de ordenador e 16,4
puntos en telefonía móbil”,
informouse.
Polo que atinxe á concorrencia na Internet do colectivo profesional,
dicir que apenas a cuarta parte dos seus integrantes, con acceso á
Rede, conta con páxina web de seu. Ou sexa, que a taxa é de 11,1
puntos por debaixo das sociedades. Con todo, a situación mellora no
que se refire ás redes sociais, xa que se ten detectado un crecente
uso das mesmas como ferramentas para a visualización de produtos e
servizos dos autónomos. Así, o
16,1% dos que contan con conexión a Internet ten unha presenza
activa nas redes sociais, superando incluso á media do conxunto das
microempresas (12,9%). En canto aos procesos de xestión e
administración interna da empresa (factura electrónica, banca
electrónica, sinatura dixital,…), o 32% dos autónomos emprega
solucións informáticas para a xestión administrativa de clientes e
provedores, xunto coas de vendas e compras
A
maiores, unicamente
un 7,1% do
colectivo profesional
envía as súas facturas de
xeito electrónico,
mentres que o 16,2% as recibe. A sinatura dixital é escasamente
empregada polos autónomos galegos (14,3% entre os autónomos con
conexión a Internet fronte ao 38,8% das sociedades).
Segundo
fixo saber Mar Pereira na presentación destes datos, o Goberno
galego está a despregar neste intre unha serie de iniciativas para
incrementar as taxas de uso das TIC entre estes traballadores: “Dende
a Xunta de Galicia estase a potenciar a formación dos empresarios e
autónomos no uso das TIC a través da Rede de aulas CeMit e do
Centro Demostrador TIC; así,
a
Rede CeMIT realizou no 2012 actividades dirixidas á pequena empresa
e traballadores autónomos para aumentar a visibilidade empresarial a
través de ferramentas de localización, de promoción e captación
de clientes a través das redes sociais e profesionais e sobre a
difusión de servizos mediante blogs”.
A
maiores, sinalou Pereira, o Centro
Demostrador TIC acubillou
máis de 100 horas de formación dirixidas a autónomos e
microempresas
sobre comercio electrónico, promoción
dixital e o emprego da factura electrónica, do certificado dixital e
de servizos na nube, entre outros.
“Durante
2013 e en colaboración con FEAGA”, concluíu Pereira,
“seguirase apostando pola vía da capacitación tecnolóxica en
comercio electrónico, facturación electrónica e marketing desde o
CDTIC e, tamén a través da Rede CeMIT, facilitándose o
asesoramento tecnolóxico de expertos a grupos de autónomos en
función da súa actividade e, en colaboración con FEAGA,
deseñándose unha solución tecnolóxica aplicable a
diversos sectores de actividade para a xestión integral do negocio,
que permitirá aos autónomos ver de forma práctica a aplicación
das TIC na súa actividade”.