O alcalde de Ourense pide a Educación implantar na cidade o Grao de Intelixencia Artificial
xoves, 25 de marzo do 2021
O
alcalde de Ourense, Gonzalo Pérez Jácome, remitiu
unha carta ao conselleiro de Cultura, Educación e Universidade da
Xunta de Galicia, Román Rodríguez, para reivindicar a implantación
no Campus de Ourense do Grao de Intelixencia Artificial como nova
titulación universitaria de Galicia para o curso 2022-2023.
No
comunicado o rexedor lembra que o dito grao, unido ao Centro de
Intelixencia Artificial posto en marcha recentemente polo Concello,
convertería a cidade nun referente internacional en tecnoloxías
avanzadas da información: “Consideramos que sería un apoio
fundamental para a consolidación deste papel referencial que se
poida implantar un Grao de Intelixencia Artificial no Campus de
Ourense”.
Entre
os puntos fortes que avalan esta proposta, o alcalde subliña que
“foi a Escola Superior de Enxeñería Informática a primeira en
mostrar o seu interese formalmente por esta titulación; contan unha
experiencia de máis de 30 anos en estudos de Enxeñería
Informática; o perfil tecnolóxico encaixa coa Universidade de Vigo,
enfocada no campo da tecnoloxía; e por último, a implantación
desta titulación harmonizaría en Ourense as políticas académicas
coas doutras administracións”. Motivos estes polos que o alcalde
conclúe que agarda “contar co respaldo da Xunta de Galicia”.