O alumnado de tecnoloxía audiovisual do Campus de Pontevedra enche YouTube de vídeos caseiros
martes, 5 de maio do 2020
O
confinamento tamén é unha oportunidade para facer voar o espírito
creativo. Así o entendeu o alumnado do grao en Comunicación
Audiovisual do Campus de Pontevedra (UVigo), que, no marco da
formación práctica para Tecnoloxía dos medios audiovisuais, está
a realizar nestas semanas de reclusión nos seus fogares unha serie
de pequenas curtametraxes desde as súas casas, valéndose dos
recursos dispoñíbeis nos seus fogares (o atrezzo nas súas
máis variadas manifestacións domésticas) e tirando proveito dos
dispositivos tecnolóxicos como ferramentas de gravación e
distribución. As
curtas reúnense nunha canle de Yotutube, ao tempo que se
difunden a través das redes sociais co cancelo #cortosnacasa.
A
iniciativa, como explica o profesor responsábel da materia, Paulino
Pérez, xurdiu ante a imposibilidade, por mor da crise da COVID-19,
de continuar na Facultade de Ciencias Sociais e da Comunicación coa
formación practica habitual dunha materia na que o alumnado debe
enfrontarse a traballos de gravación, son e edición. A experiencia
comezou con vídeos de receitas de cociña e desembocou logo nunha
segunda proposta: a creación dunha pequena curta protagonizada por
peluches ou bonecos. Baixo o título de Cortos en cuarentena
reuníronse nesta actividade outros 30 vídeos e tras estes chegou
unha terceira proposta, na que se convidou ao alumnado “a falar con
eles mesmos, a empregar unha técnica de clonación para que aparezan
varias veces en pantalla”. Ao igual que nas anteriores, nesta
terceira proposta, á que continúan sumándose traballos, optouse
por realizar curtas de non máis de dous minutos, “por tratarse de
traballos que cada alumno ten que idear, gravar, nalgúns casos cos
seus teléfonos móbiles, e editar de xeito individual”.
Malia
tratarse de traballos voluntarios, preto do 75%” dos 42 alumnos e
alumnas matriculados na materia achegaron curtas á iniciativa.