O avellentamento e a dispersión da poboación sitúanos no furgón de cola da inclusión dixital en España
luns, 15 de xullo do 2013
A nosa terra nunca o tivo doado coas redes, e agora
tampouco. Por unha banda, temos o illamento económico e tecnolóxico
do que ten sido obxecto por parte de múltiples gobernos. A isto
cómpre engadir a falta de interese das operadoras para dotar de boa
cobertura a totalidade da nosa terra, facendo fincapé no rural e nas
zonas máis illadas dos grandes núcleos de poboación. Pero hai máis
ingredientes que engadir, como por exemplo o problema da orografía
accidentada e, agora máis que nunca, o problema do despoboamento e o
avellentamento de amplas zonas do noso rural. A Rede chega tarde ás
aldeas e vilas que estaban en maior risco de verse baleiradas e
depauperadas? Pois probablemente. Ou polo menos isto é o que se
desprende do Informe
eEspaña 2013, da Fundación Orange, que
empraza á nosa terra no último posto en no que se refire á
inclusión en novas tecnoloxías da información.
De feito, os galegos obtemos só 57 puntos no Índice
de Converxencia de eInclusión, fronte aos 91 de Madrid, por exemplo.
Asemade, aínda que sobe a cifra de conexións a un ritmo superior ao
que acontece noutras comunidades, se cadra era moito o que cumpría
remontar, e os problemas de despoboamento e de infraestruturas son
grandes de máis como para acadar a plena converxencia a tódolos
niveis, engádese no informe. Resultado: o noso país está na cola
da listaxe, xunto a Asturias, Andalucía e Canarias, no que se refire
a inclusión dixital.
O envellecemento, explícase, é un factor a ter moi
en conta. De feito, canto maior é a idade da cidadanía menor é o
hábito da navegación. Para os autores do informe, “os maiores
de 65 anos obteñen os mellores niveis de inclusión dixital en
Cataluña, mentres que se atopan menos integrados na sociedade
dixital en Galicia, Estremadura e Andalucía, por outra banda as
rendas máis baixas teñen máis dificultades para integrarse na
Sociedade da Información”. Polo que atinxe ao hábitat,
Canarias e Galicia presentan niveis de exclusión dixital case tres
veces superiores a Madrid.
Con todo, cómpre sinalar que na investigación
tamén se indica que o número de fogares galegos con Rede contratada
medrou un 53,4% no período 2008-2012 (pasando dun 36,7% a un 56,3% o
ano pasado), duplicando a media europea. Dito doutro xeito: o
afianzamento das TIC nas vivendas crece a máis velocidade ca en
España e en Europa (con máis de cinco puntos de distancia nos dous
casos). Malia o positivo destas cifras, cómpre ter en conta o feito
de que tiveramos partido dunha situación de total desvantaxe, polo
tanto a costa arriba a remontar é, para nós, dobremente empinada.