O compostelán Francisco Vallejo, novo director territorial de Vodafone para a Zona Norte
martes, 29 de marzo do 2022
Vodafone
España vén de nomear ao compostelán Francisco Vallejo novo
director territorial da Zona Norte, que inclúe as comunidades de
Galicia, Castela e León, Asturias, País Vasco, Cantabria, Navarra e
A Rioxa. A traxectoria profesional de Vallejo estivo ligada desde o
seu comezo a Vodafone, ocupando distintos postos de responsabilidade
nas áreas de Tecnoloxía, Mercadotecnia e Vendas. Segundo informou a
operadora, Francisco conta cunha ampla experiencia na dirección de
equipos, tanto centrais como rexionais.
Francisco
Vallejo iniciou a súa carreira profesional en Vodafone en 1996 como
enxeñeiro no equipo de Tecnoloxía de Rede. En 2004 incorporouse a
Vodafone Business para liderar o lanzamento de Oficina Vodafone (One
Net). Foi nomeado responsábel de Vendas en 2007 e desde 2013 exerce
funcións de responsábel territorial na rexión, o que “lle
proporcionou un alto coñecemento das necesidades do tecido
empresarial da zona”, explica a operadora.
Francisco
Vallejo sinalou que este é “un dos retos máis importantes da miña
traxectoria profesional”. E engadiu: “Como director na zona norte
o meu obxectivo é continuar apostando por ser pioneiros en
innovación e acompañar aos nosos clientes nos seus procesos de
transformación dixital. A miña meta é apoiar ás pemes, dotalas de
ferramentas e de solucións que lles permitan ser máis eficientes,
así como buscar e aproveitar novas oportunidades de negocio”.
Vallejo
é enxeñeiro de Telecomunicacións pola Universidade de Vigo e conta
cun mestrado en Administración de Empresas pola Escola de
Organización Industrial.