O galego Suso Baleato achega un estudo que certifica a discriminación dixital dos grupos excluídos politicamente
xoves, 8 de setembro do 2016
Este venres a revista Science,
referencia mundial no ámbito da investigación e a innovación
científicas, publica un traballo no que participou Suso
Benítez-Baleato,
membro do grupo de investigación de Análise Política adscrito ao
Departamento de Ciencia Política da Universidade de Santiago.
Segundo informa a USC, Benítez-Baleato foi o responsábel de
desenvolver os indicadores estatísticos do estudo. Nel achéganse
unha manchea de datos de valor sobre unha realidade de Internet que
en moitas ocasións arrédase de nós e non somos quen de ver debaixo
das súas supostas vantaxes democratizadoras, integradoras e
alfabetizadoras. Falamos da discriminación dixital dos grupos
politicamente excluídos. Un proceso que vai a máis e que ten
raizames máis fondas do que se supuña.
Segundo engade a USC, o equipo
de estudosos cos que traballou o investigador galego tirou proveito
de estimacións de alta precisión sobre a penetración de Internet
para demostrar que “os grupos politicamente marxinados presentan
significativamente menores taxas de penetración en comparación con
aqueles no poder”, “un efecto que non pode ser explicado
unicamente por factores económicos ou xeográficos”, avisan.
A achega do investigador galego
desenvolveuse no contexto dunha estadía na universidade alemá de
Constanza baixo a dirección de Nils B. Weidmann, principal asinante
do artigo. En colaboración co Departamento de Enxeñería
Electrónica do recoñecido Instituto Federal de Tecnoloxía de Suíza
(ETH Zúric), Benítez-Baleato desenvolveu un novo método baseado na
análise do tráfico global de Internet.
Segundo explica o propio
Benítez-Baleato, o novo método (presentado na Universidade de Nova
York) “emprega un sistema de análise espacial que permite estimar
a penetración de Internet practicamente en tempo real, mesmo en
zonas de guerra ou baixo o control de réximes autocráticos”.
A este respecto, o investigador
da USC engade que o método funciona como se fora un telescopio de
gran precisión instalado nun satélite. “Isto permite esculcar a
conectividade de calquera área do planeta aumentando a imaxe tanto
como sexa necesario para calcular a penetración por países,
provincias ou mesmo municipios, e observar a súa evolución por
anos, meses ou mesmo por semanas”, explica.
En definitiva, o obxectivo do
traballo foi probar se os grupos politicamente máis desfavorecidos
son sistematicamente privados do acceso ás novas tecnoloxías polos
seus gobernos. O estudo, ao fío do devandito, compara os efectos de
distintos factores sobre a penetración de Internet, incluíndo o
nivel económico e o grao de inclusión dos grupos nas institucións
políticas. Para o cálculo destes indicadores os estudosos
empregaron unha gran variedade de datos, incluída a emisión de luz
nocturna rexistrada polos satélites da NASA.
Segundo informan os
investigadores sobre a natureza e finalidade do seu traballo, “os
nosos resultados poñen de manifesto a existencia de impedimentos á
chamada tecnoloxía da liberación”, impedimentos dos que serían
en boa medida responsábeis os gobernos. De feito, aclaran, na
maioría dos países en desenvolvemento os gobernos “son o
principal, se non o único, provedor dos servizos de
telecomunicacións”.
O informe salienta polas
implicacións dos datos que achega. Segundo explica o investigador da
USC, “malia que Internet continúa tendo claramente o potencial de
promover a mobilización para o cambio político, os gobernos poden
impedir este efecto, o que debería levar aos estudosos dos efectos
da comunicación tecnolóxica a reconsiderar as circunstancias nas
que Internet pode realmente contribuír ao cambio político”.