O prazo para concorrer no premio de publicidade en galego da RTVE e a CRTVG remata o 15 de xullo
venres, 24 de xuño do 2011
- O anuncio de Gadis, premiado na anterior convocatoria do concurso
Segundo informa o
Consello Asesor de RTVE e a CRTVG o vindeiro 15 de xullo remata o prazo
habilitado para achegar propostas na dezaoito edición dos Premios
de Publicidade en Galego. O certame, convocado polo devandito Consello, resolverase
no vindeiro mes de outubro, nun acto de entrega de galardóns a desenvolver en
Vigo. Dáse a casualidade de que o concurso, segundo informan os organizadores o
único no que se recoñece o bo facer na promoción feita no noso idioma, vén con
tres modalidades: radio, TV e Internet.
Tendo
en conta o estipulado nas bases, as achegas aspirantes aos premios deberán
cumprir o requisito de ter sido difundidas entre o 1 de xaneiro e o 31 de
decembro de 2010. Poderán optar aos galardóns, engade o Consello Asesor, medios
de comunicación, axencias o promotoras “que
divulguen anuncios publicitarios nas modalidades de cuña radiofónica, spot televisivo ou banner”.
O xurado,
composto polo pleno do Consello Asesor, terá en conta cuestións e valores como
por exemplo a singularidade e a orixinalidade da produción, o maxín disposto, a
calidade lingüística oral e escrita e o contido multimedia dos traballos para
internet.
O premio consiste
nunha peza orixinal que vai variando cada ano e que na última edición,
presentada e celebrada en Lugo, representaba a muralla romana, a través dunha
obra do artesán André de Navia, en prata, madeira e lousa. Nesa ocasión concorreron
126 anuncios aos premios, e foron galardoados o spot Maloserá de Gadis; a cuña radiofónica Arts divino de Radio Nordés (SER), o banner da XXVI Mostra de Olería de Buño, e o deseño gráfico Achega a muralla de Lugo a toda Europa,
da empresa Mombús.