O premio da FIC ao mellor traballo fin de grao xa ten finalistas
xoves, 1 de decembro do 2016
A Facultade
de Informática da Coruña vén de dar a coñecer que o Premio
ao Mellor Traballo Fin de Grao Aplicado xa ten finalistas. Á
resolución chegouse logo dunha pormenorizada valoración das
propostas de dezasete candidatos. Finalmente, as empresas
patrocinadoras do certame elixiron cinco
das devanditas achegas, tendo en conta, ante todo, criterios de
calidade técnica e de aplicación inmediata. Os traballos
seleccionados, informa a FIC, abranguen temáticas dispares, aínda
que teñan o nexo común de compartiren un miolo
tecnolóxico-informático. Esta edición conta co patrocinio de
Everis, Grupo Voz, Indra, Instituto Tecnolóxico Galego e Telecom,
ademais da colaboración do Centro de Investigación TIC (CITIC) e a
Fundación Universidade da Coruña (FUAC). A resolución dos
galardóns celebrase en xaneiro de 2017.
Os proxectos finalistas son os seguintes: Deseño
e implementación dunha aplicación web para a xestión de proxectos
de homologación de reformas de vehículos para unha empresa real
(Esteban Abanqueiro Agrelo), Sistema de Domótica para a xestión
enerxética intelixente (Óscar Branco Novoa), Sistema para o
manexo e xestión de árbores familiares orientadas ao apoio e ao
diagnóstico clínico de doenzas hereditarias (de Elías Grande
Cásedas), Control da produción dun viñedo a través de
sensores, para mellorar a calidade e aumentar o volume en base a
factores externos e internos, accesibles mediante unha interface web
(de Josman Pedro Pérez Expósito) e Sistema integrado para a
creación e publicación de levantamento catastral na República do
Salvador (de Juan Santos García-Toriello).