O programa H2020 e as súas oportunidades de transferencia no eido das Cidades Intelixentes, a debate este mércores na UDC
martes, 9 de decembro do 2014
Este mércores celébrase
na Universidade da Coruña un encontro destinado a informar en
detalle do novo programa H2020, abordando as súas novidades máis
relevantes con respecto a anteriores convocatorias e afondando nas
características e oportunidades doutros programas internacionais
para entidades con vocación de traballar en proxectos colaborativos
empresa-centros tecnolóxicos. A xornada A Smart, Blue Horizon
2020, segundo nos avanza o Colexio Oficial de Enxeñeiros de
Telecomunicación de Galicia, que estará presente na cita a través
do seu decano (participando nunha das mesas de debate),
desenvolverase no paraninfo da Reitoría da UDC.
As temáticas principais, amais dos devanditos
programas de colaboración, serán as cuestións da transferencia
tecnolóxica, as Cidades e Comunidades Intelixentes e máis o Blue
Growth (Crecemento Azul, unha estratexia nova de sustentabilidade
para os sectores mariño e marítimo)
A cita comezará ás 9:15 horas, cos saúdos do
reitor da UDC, Xosé Luís Armesto, e o director xeral de
Investigación da Comisión Europea, Xosé Manuel Silva, para
continuar coa intervención do profesor Moacyr Martucci, da
Universidade de São Paulo, quen falará sobre Territorios
intelixentes. Interface terra-mar.
Ás 10:20 horas chegará a quenda de Ramón Bermúdez
de Castro, decano do Colexio Oficial de Enxeñeiros de
Telecomunicación de Galicia, quen disertará sobre Continentes e
océanos: o mundo en rede. A doutora Mirta Lewis, CENPAT, falará
sobre o Programa arxentino PAMPA AZUL e, xa despois do
descanso, intervirá a doutora Vanessa Campo, de RTD, Comisión
Europea, coa conferencia Horizonte 2020: Crecemento Azul.
Ás 13:00 horas será a quenda de de Jorge Velasco,
do Centro Superior de Investigacións Científicas (Bruxelas), cunha
charla sobre O mundo bruxelense da I+i+i: ideas básicas,
e a doutora Ana Nieto, RTD, Comisión Europea, que explicará a
Avaliación da investigación universitaria respecto ao H2020.
Ás 15:20 horas continuará a xornada con Lluís
Botifoll, consultor (Bruxelas) coas súas Propostas de proxectos
terra-mar ao H2020, e Emilio Fernández, da Universidade de
Vigo, quen falará de Campus do Mar e Blue Growth. O punto
final poñerano varios membros da UDC, con Casos de éxito en
propostas ao H2020, e José Manuel Silva exporá as conclusións.
Horizonte 2020
O programa Horizonte 2020 (H2020) da Comisión
Europea é un dos principais programas de financiamento a nivel
internacional. Cun orzamento aproximado de 80.000 millóns de euros
para un período de sete anos (2014-2020), H2020 constitúe en
palabras da Universidade da Coruña “unha opción de especial
relevancia para universidades, centros de investigación e empresas á
procura de financiamento para os seus proxectos de I+D+i”.
As
primeiras convocatorias deste novo programa comezaron a publicarse en
decembro de 2013, prestando especial atención a dúas prioridades
temáticas, Blue Growth e
Smart Cities and Communities, ás que a UDC lembra que tamén
concede “unha importancia estratéxica”.