O proxecto galego SubGo achéganos á riqueza submarina galega
xoves, 26 de agosto do 2021
Ao
abeiro do programa galego-portugués Sherpa
Journeys colleu corpo unha iniciativa tecnolóxica que nos
aproxima á riqueza submarina do noso litoral e das nosas illas a
través de tecnoloxías de realidade virtual, aumentada e mixta. A iniciativa vén da man de
Silvia Iglesias e Sara Carrasco, integrantes da cooperativa 13 Grados.
SubGo
é un proxecto de educación ambiental que pretende achegar ao
público os nosos tesouros submarinos.
A
iniciativa, que colle pulo arestora no programa de acompañamento ao
emprendemento Sherpa Journeys, de Sherpa do Mar, concretarase nun
espazo de divulgación itinerante que percorrerá distintas
localizacións de interese.
Incluirá
fotografías, ilustracións, actividades interactivas e a experiencia
inmersiva en 360º polas paisaxes mergulladas da ría de Vigo, que
será, segundo indican dende a aceleradora marítima, “o prato
forte da mostra”. O obxectivo, indican Sara e Silvia, “é que os
visitantes descubran o medio mariño que lles rodea e o seu gran
valor patrimonial dunha forma diferente, concienciándoos sobre a súa
conservación e sustentabilidade”.
Para
a captación e creación do contido visual, as promotoras do proxecto
contan con distintos perfís profesionais (técnicos audiovisuais,
biólogos mariños, pilotos técnicos de ROV, etc.) e un sofisticado
equipo submarino. Os fondos submarinos da ría de Vigo, as súas
plataformas de cultivo, os bosques de algas pardas ou as pradarías
de zostera serán “as grandes protagonistas destas imaxes”, aínda
que o propósito é que “a iniciativa poida expandirse a máis
localizacións, tanto a nivel galego como a outras comunidades e
países”.
SubGo
atópase en fase de desenvolvemento actualmente. “Estamos a tomar
as imaxes, revisando os contidos, redactando os guións e creando as
actividades de experiencia virtual”, comenta Silvia, engadindo que
a previsión é “que o proxecto se lance ao mercado nun prazo
máximo dun ano e poida exporse en posíbeis localizacións de
interese, como centros educativos, de investigación e divulgación
científica, museos ou centros de interpretación”.