O xornal de pesca Trueiro ábrese á Rede
mércores, 28 de maio do 2014
Os
afeccionados á pesca deportiva teñen un novo espazo de referencia na Rede
grazas a que o xornal Trueiro, publicado
dende 2008 en papel, renova a súa presenza na web cun novo deseño que permite
que a publicación non se limite a chegar aos seus lectores catro veces ao ano
na súa edición impresa, senón que estea actualizada con maior frecuencia grazas
á canle que abre a Internet.
Temos así que a revista en papel Trueiro reinvéntase como un diario dixital
para os galegos que gusten da práctica da pesca, facilitándolle novas, artigos
de divulgación, denuncias, críticas e mesmo “o aplauso cando se mereza”.
Completa a súa presenza dixital con espazos nas
plataformas sociais Facebook e Twitter.
A publicación leva anos reivindicando a práctica da pesca non só como unha
actividade de lecer, senón tamén como unha peza chave na conservación dos nosos
ríos, da divulgación da fauna fluvial, as artes de pesca e a actividade no
sector dentro do noso territorio e incluso como espazo de opinión, roles que se
reforzan grazas á nova aposta pola Rede como canle de comunicación establecida
a través do xestor de contidos Opennemas,
empregado por outras publicacións como El Ideal Gallego, Mundiario ou Sermos
Galiza.