O xornalista Juanma Romero (TVE) mostrará ao tecido emprendedor de Ferrol como visualizarse nas novas canles
xoves, 17 de novembro do 2022
O
xornalista Juanma Romero, director do programa de TVE Emprende.
impartirá na nosa terra un obradoiro para persoas emprendedoras
e unha conferencia aberta o día 22. A actividade dupla está
organizada pola Asociación de Empresarios Ferrolterra coa
colaboración do Concello de Ferrol, co “obxectivo de visualizar e
reivindicar a cidade departamental como referente emprendedor”.
As
actividades terán lugar no antigo Hospicio e comezarán co
obradoiro, que se desenvolverá de 16.00 a 18.45 horas cun máximo de
dez prazas. Juanma Romero aprenderalles ás persoas participantes
como analizar cadansúas ideas de negocio e a importancia da
visibilidade nos medios e ferramentas de información comunicación.
Os seus obxectivos son: potenciar a xeración de novos negocios e
formar a emprendedores e emprendedoras e a empresas de servizos
(comercio e hostalería sobre todo) para conseguir unha maior
visibilidade e aumentar as súas posibilidades de éxito.
Cun
enfoque práctico, abordaranse cuestións como o emprendemento; as
habilidades sociais e a economía; o carisma e a comunicación; a
venda en plataformas dixitais ou a transformación dixital e os novos
empregos vinculados a ela.
Por
outra banda, ás 19.00 horas celebrarase unha conferencia do propio
Juanma Romero aberta ao público en xeral, aínda que especialmente
pensada para persoas emprendedoras e interesadas no emprendemento,
empresas e estudantes. Tras unha presentación, o xornalista falará
do tema que da nome á xornada: Emprender desde Ferrol para o
mundo é posíbel. O obxectivo da charla é mellorar o
posicionamento de Ferrol como referente emprendedor, promocionando
entre a poboación a cultura emprendedora e deixando claro que desde
Ferrol se pode emprender sen fronteiras.
O
programa que dirixe Juanma Romero emítese semanalmente no Canal 24
Horas, La 1 e todas as canles internacionais de TVE, así como nas
redes sociais Facebook, Twitter e Youtube en directo. O xornalista
conta con máis de 50 premios nacionais e internacionais como
recoñecemento ao seu labor profesional no mundo do emprendemento, a
comunicación, o xornalismo, a difusión da transformación dixital e
as novas profesións.
As
persoas interesadas en inscribirse tanto no taller como na
conferencia poden facelo na
web da AEF ou a través do teléfono 981 333 305.