Oleiros ofrece ás persoas maiores dous obradoiros básicos sobre móbiles e informática

A veciñanza de Oleiros vai poder compaxinar este duro inverno coa formación de base no uso de dispositivos e informática. Estamos a falar dos cursos para persoas maiores Manexo de móbiles e Informática básica, que organiza esta tempada o Concello, a través da Concellería de Servizos Sociais e Igualdade. Por certo que o luns 3 de febreiro procederase a abrir o prazo de inscrición para os dous obradoiros de iniciación. Ambos están dirixidos a persoas maiores de 60 anos empadroadas no termo municipal.
Os obxectivos principais destes cursos son mostrar de “forma práctica, amena e guiada” e máis sinxelos xeitos de aproveitarmos as posibilidades que ofrecen as tabletas, os smartphones e máis os computadores. Outra das finalidades é achegar recursos para mellorar a calidade de vida das persoas maiores, achegándoas ás vantaxes das novas vías de comunicación e mellorando o envellecemento saudábel, a autonomía e o enriquecemento persoal da veciñanza.
As inscricións serán a través da web municipal www.oleiros.org, na sede electrónica, no apartado cidadáns e empresas, en trámites en liña, a partir das 9:00 horas do luns 3 de febreiro e rematará ás 20:00 horas do 6 de febreiro. As prazas adxudicaranse por orde de inscrición. Para calquera aclaración, as persoas interesadas poden poñerse en contacto con Servizos Sociais e Igualdade.