Os Piratas de Galicia queren dar exemplo de campaña electoral sostible
venres, 5 de outubro do 2012
Comezou a campaña
electoral galega e entre os partidos que máis queren apostar polas novas
tecnoloxías nos formatos e nos contidos elixidos (e é normal que así sexa, tratándose
dunha agrupación que xurdiu ao acubillo das redes e nomeadamente da cultura
libre que propician as redes) están os Piratas, cuxa facción galega, que coa
arela de promover os seus candidatos en dúas das catro provincias galegas (Ourense
e Pontevedra), anuncia que a súa sede será
(como non) Internet e que entre outras accións levaranse a cabo pegadas de carteis
virtuais pola casa en liña, por enteiro.
Isto non quita,
din, que non vaia haber xente pola rúa, explicando en que consiste a proposta
dos Piratas de Galicia. Pero iso si: ficando á marxe, totalmente, do estrago
económico no que caen, unha vez tras outra, os principais partidos coas súas campañas,
de meirande gravidade “nun tempo no que a
crise apachoca a todos”, sinalan os piratas. A xuízo desta agrupación, é cen por cen ilóxico
a disposición de cinco millóns de papeletas que se imprimen para as eleccións
das que só se empregará o 1%. “Para cando
unhas papeletas únicas con tódolos partidos e marca de voto?”, pregúntanse.
Ao fío disto, os Piratas de Galicia xa anunciaron que denunciarán nas xuntas
electorais as iniciativas máis irresponsábeis co contorno e as que acheguen máis
custe económico innecesario.