Os desafíos das relacións públicos no eido dixital, polo miúdo no Campus de Pontevedra
xoves, 4 de maio do 2017
A
Facultade
de Ciencias Sociais e da Comunicación do Campus de Pontevedra acolle
dende este mércores un congreso sobre relacións públicas e sobre
os desafíos aos que se enfronta este ámbito de traballo coa
sociedade dixital. Segundo se fixo saber no evento, unha xuntanza
que procura enxalzar o labor da comunicación nunha empresa ou
entidade, as novas tecnoloxías imprimiron non poucas vantaxes neste
eido, pero tamén unha serie de cuestións de risco. En palabras do
investigador Antonio Castillo, da Universidade de Málaga, na
sociedade da comunicación dixital, os erros poden ser fatalmente
decisivos, posto que “serán coñecidos por todos e cada un dos
implicados”. A
edición número 12 do Congreso Internacional de Investigadores en
Relacións Públicas vén da man das universidades de Vigo e Minho.
No
evento, que se celebra por segunda vez no Campus de Pontevedra,
participan preto de 70 expertos, profesionais e estudantes,
procedentes de España e Portugal pero tamén de Arxentina,
Venezuela, Colombia e México defenderán as súas investigacións
nas súas diferentes mesas temáticas.
A
conferencia inaugural do congreso correu a cargo do consultor
portugués Renato Póvoas, autor do primeiro blog especializado nesta
disciplina de Portugal, Relações
Públicas Sem Croquete, no que incide no “carácter
técnico” dunha disciplina que vai alén, como sinala, dos eventos.
Afondar na situación no que se atopan as RRPP en Portugal desde unha
“perspectiva práctica”, foi o eixo central dun relatorio no que
este profesional salientou tamén as “grandes transformacións”
que se están a vivir nun ámbito “en auxe por forza da
dixitalización da comunicación e das redes sociais”.
Póvoas
salientou que o principal desafío para os e as profesionais do eido
pasa por “percibir cal é o noso espazo”. E engadiu: “Penso que
as RRPP deben cada vez máis gañar coñecemento sobre outras áreas
complementarias, xa que deben estar no centro de todo o proceso de
comunicación”. Asemade, destacou que “achámonos na era dos
contidos e a era dos contidos é a era das relacións públicas”,
avogando para “xuntaren forzas a comunidade científica e
empresarial e podermos todos camiñar no mesmo sentido”.
As
xornadas teñen como eixo central as cinco mesas temáticas nas que
se presentarán un total de 34 comunicacións. Estes bloques son:
relacións públicas e medios, sector profesional, xestión de
comunidade, públicos emerxentes e formación e investigación en
RRPP.