Os equipos de Talentos Inclusivos do CITIC presentan este venres as súas solucións para persoas con parálise cerebral
venres, 17 de xuño do 2022
O
proxecto Talentos
Inclusivos, posto en marcha polo Centro de Investigación TIC
(CITIC) da Universidade da Coruña e ASPACE Coruña, finaliza este
venres 17 de maio a súa segunda edición con preto dunha vintena de
solucións tecnolóxicas desenvolvidas por parte de estudantes de
centros educativos de toda a provincia, todas elas co nexo común de
mellorar a calidade de vida de persoas con parálise cerebral. Os
resultados desta segunda edición do proxecto preséntanse este
venres nunha xornada de clausura. Será a partir das 10:30 h no salón
de actos do edificio da Facultade de Socioloxía e da Facultade de
Ciencias da Comunicación da UDC.
A
iniciativa conta co apoio do Consello Social da UDC, a Fundación
Española para a Ciencia e a Tecnoloxía (FECYT), a Consellería de
Cultura, Educación e Universidade da Xunta de Galicia e o Concello
da Coruña.
Segundo
informa o CITIC, Talentos Inclusivos ten o obxectivo duplo de
“espertar vocacións tecnolóxicas entre a xuventude e, á súa
vez, sensibilizar sobre a diversidade funcional, a través da
colaboración entre equipos de traballo formados por estudantes de
Secundaria e Bacharelato xunto con usuarios de ASPACE, para resolver
retos tecnolóxicos propostos por persoas con parálise cerebral”.
Preto
de 200 estudantes de Secundaria e Bacharelato de 10 centros
educativos da provincia da Coruña participaron no proxecto. Algúns
dos retos que se presentarán son ramplas de accesibilidade en
impresión 3D portátiles, timbre e mando a distancia de televisión
adaptados, produtos de accesibilidade para ordenador e tableta, e
diferentes xogos como dominós, videoxogos e elementos de
ocio-musical controlados por sensores.
A
mesa de apertura do acto contará coa presenza do vicerreitor de
Política Científica, Investigación e Transferencia da UDC,
Salvador Naya Fernández; a subdirectora xeral de Innovación,
Orientación e Formación de Recursos Humanos da Xunta de Galicia, Mª
Eugenia Pérez Fernández; a directora do departamento de Cultura
Científica e da Innovación da FECYT, Rosa Capeáns Garrido; o
concelleiro de Educación, Memoria Histórica, Innovación, Industria
e Emprego do Concello da Coruña, Jesús Celemín Santos; o
secretario do Consello Social da UDC, Jesús Spósito Prado; e a
presidenta de ASPACE Coruña, Carmen Barreiro Santos. Posteriormente,
os equipos de estudantes presentarán os seus traballos, introducidos
polo investigador principal do proxecto e subdirector do CITIC,
Javier Pereira Loureiro, e a coordinadora do proxecto en ASPACE, Iria
Robles Viqueira. Finalmente, o director do CITIC, Manuel F. González
Penedo, pechará a xornada.