Os maiores de InLugo inmortalizan a Muralla cos seus smartphones e tabletas
mércores, 9 de decembro do 2015
O InLugo,
o Centro de Innovación Social que xestiona a Fundación TIC
(Deputación de Lugo) vén
de sumarse á celebración do 15 aniversario da Muralla como
Patrimonio da Humanidade. E fíxoo cun obradoiro de fotografías
sobre o monumento e cunha mostra das imaxes dixitais obtidas polos
participantes na iniciativa: veciñas e veciños usuarios de InLugo
(todos eles maiores de 55 anos e beneficiarios das actividades e
envellecemento activo do centro social). No obradoiro fotográfico
que acompañou a celebración, os usuarios de InLugo foron
introducidos na práctica de fotografar con dispositivos móbiles e
na de corrixir e retocar o resultado dos seus traballos.
Segundo
fan saber dende a Fundación TIC, “con esta iniciativa quíxose
render unha homenaxe ao monumento local máis emblemático coa posta
a disposición dos nosos maiores dos medios e as habilidades precisas
para o emprego de novas tecnoloxías que forman parte da vida cotiá
do común da cidadanía, como é a realización de fotos con móbiles
ou tabletas”.
A
Fundación TIC tamén fixo saber que a actividade estendeuse a todos
os maiores da provincia, non só aos usuarios do InLugo, xa que todas
as persoas de máis de 55 anos interesadas en amosar as súas
fotografías da muralla puideron expoñelas na exposición (a mostra
Tende en colga nas
rúas de Lugo até o 8 de decembro).
Estas
accións insírense no programa Fóra
e dentro do
InLugo, que incluirá diversas citas e eventos relacionados coas
novas tecnoloxía nunha festa de Nadal, o 22 de decembro, “coa que
se porá fin ao primeiro trimestre de cursos e obradoiros da
tempada”. Esta iniciativa estará aberta a todos os maiores da
provincia.