Os maiores de Lugo “camiñarán coas TIC” ao longo deste mes
xoves, 19 de febreiro do 2015
Onte
botaba a andar un novo programa encamiñado ás persoas
maiores da provincia de Lugo,
estamos a falar do Camiña
coas TIC. A aposta,
organizada pola Fundación TIC (dependente da Deputación), quere
promover o uso das novas tecnoloxías como ferramenta para motivar a
realización de exercicio físico. Camiña
coas TIC
presentábase onte no Valadouro cunha ruta na que os participantes
estiveron acompañados polo Deputado de Economía do Coñecemento,
Emprendedores e Innovación, Alfredo Llano, e o Alcalde do
Valadouro, Edmundo Maseda.
En Camiña
coas TIC os
participantes empregan aplicacións en dispositivos táctiles como
poden ser o compás, o podómetro, o cardiógrafo, un contador de
calorías, un recordatorio de beber auga, un botón de alerta e un
buscador de rutas. Tamén se
tira partido de dispositivos
cuantificadores para entender o seu funcionamento e os
beneficios que achega o propoñernos novos retos a cumprir cada día.
O material será cedido polo equipo de Camiña coas TIC, ao
igual que os dispositivos táctiles para aqueles que non os teñan.
Despois
do encontro no Valadouro, Camiña
coas TIC desprazarase
hoxe ás 16:00 horas a Friol. Continuará o 20 de febreiro, tamén ás
catro da tarde, en Becerreá; o luns 23, ás 11:00 horas en Vilalba,
e as 17:00 en Guitiriz; o martes 24 no Incio ás 10:30 horas; o 25 de
febreiro ás 16:00 en Chantada e finalizará o xoves 26 en Lugo ás
11:00. Ese mesmo día terá lugar pola tarde un acto conxunto coa
entrega de diplomas.
A engadir que cadanseu obradoiro contará coa participación dun
mínimo de 10 persoas maiores de cada zona, que serán guiadas por
dous monitores. Toda a información relativa a Camiña coas TIC
atópase na páxina
da Fundación TIC.