Os obradoiros de Crea R chegan o día 20 a Ribadeo
mércores, 10 de outubro do 2018
A
operadora R vai organizar o 20 de outubro un novo obradoiro de
robótica para a rapazada: unha acción onde dar renda solta ao
talento que todas as nenas e nenos atesouran. Desta volta, a cita
(inserida no programa Digitalent 2020 da axencia autonómica AMTEGA)
será
en Ribadeo e estará novamente dirixida a cativos de entre 7 e 15
anos. A actividade formativa é de balde e nela os asistentes
terán unha oportunidade de ouro para iniciarse na creatividade
tecnolóxica e ir enfiando as súas importantes capacidades cara este
eido, un ámbito de grandes posibilidades creativas, dixitais,
sociais, laborais e persoais.
Os
obradoiros terán unha duración de dúas horas nas que a rapazada
participante construirá e programará robots, marcadores de puntos e
coches. Isto que significa? Pois en palabras da operadora de
telecomunicacións galega, que os asistentes mergullaranse de cheo na
programación, na construción de estruturas de enxeños tecnolóxicos
e na experimentación in situ da súa operatividade final (vendo
“como os obxectos toman vida”). En concreto, o obradoiro
encamiñará ás nenas e nenos para que o robot no que traballarán
camiñe, para que un marcador leve os puntos dos equipos nun partido
e para que un coche acelere.
Haberá
unha primeira quenda para nenas e nenos de 7 e 8 anos, de 10:00 a
12:00 h. Deseguido, os cativos de 9 a 11 anos serán quen desfruten
desta iniciativa, de 12:00 a 14:00 h. E xa pola tarde, de 16:30 a
18:30 horas, rapaces de 12 a 15 anos rematarán esta xornada coa que
sobre todo se procura que aprendan mentres se divirten.
As
persoas que se inscriban, deberán facelo na tendaR do número 28 da
rúa de Galicia, en Ribadeo, onde poderán solicitar un convite para
as 60 prazas dispoñíbeis.
Percorrido
pola nosa xeografía
R retoma o fío dos seus talleres logo
das experiencias do ano pasado, no que a operadora de raizame galega
percorreu máis dunha vintena de localidades das nosas catro
provincias. O periplo recomezou os días pasados, na feira de
emprendemento innovador Pont Up Store de Pontevedra e máis en
Baiona, e agora prosegue coa recalada en Xuventude Galicia Net (esta
finde en Silleda), coa devandita cita de Ribadeo e (máis
adiante) coas de Tui, Caldas, Porriño e Santa Comba.
A
finalidade de Crea R (a iniciativa que achega alicerce a estes
obradoiros) é que “os nenos desenvolvan e potencien a súa
creatividade, que esperten o seu espírito emprendedor ao tempo que
adestran habilidades importantes como o traballo en equipo e a
comunicación”. Ademais procúrase que “deixen de ser meros
consumidores pasivos de tecnoloxía e boten man dela, desta volta,
para crear e aprender”.