Os proxectos seleccionados por VíaVigo poderán recibir 125.000 euros
venres, 27 de xuño do 2014
O programa de apoio e
asistencia a emprendedores do Consorcio da Zona Franca, ViaVigo,
vén de recibir un importante pulo á súa actividade. En base a este
impulso, segundo informan os seus responsábeis directos, a
aceleradora destinará aos dez proxectos seleccionados na súa
segunda convocatoria un capital de 1.250.000 euros entre capital
semente e achegas a fondo perdido, máis outros 250.000 euros en
gastos de formación e consultoría. Estas cifras, engaden fontes do
Consorcio, emprazan
á aceleradora VíaVigo como a máis potente de todo o Estado
español.
Así o fixeron saber os
seus impulsores en rolda de prensa na mañá deste venres, unha cita
cos medios na que participaron a delegada de Estado do Consorcio,
Teresa Pedrosa, Manuel Varela, director da Axencia Galega de
Innovación, Juan Cividanes, director de XES Galicia e Pedro Núñez,
director de Vigo Activo SCR. No encontro coa prensa amosaron o acordo
de participación da Xunta na aceleradora do Consorcio e anunciaron a
ampliación do prazo de presentación de ideas até o 31 de xullo. En
palabras de Pedrosa, “este convenio e esta importante achega de
capital que vén de mans da Xunta nos proxectos de VíaVigo converten
a aceleradora na mellor e máis potente lanzadeira empresarial de
España”.
A delegada de Estado,
amais de salientar o capital destinado, destacou tamén os activos
intanxíbeis de VíaVigo, “a parte máis importante da aceleradora,
porque nela dáse soporte a emprendedores e empresas que se atopan na
súa fase inicial a través dun completo programa de maduración para
o desenvolvemento que dura un ano e durante o cal se lles proporciona
formación, titorías, traballo en equipo, aloxamento e asesoramento
intensivo, co obxectivo de que as ideas de negocio saian ao mercado
preparadas de abondo para chegar ser empresas de éxito”. Esta
preparación, que deseña e asume na súa totalidade a Zona Franca,
cuantificouse ao redor duns 25.000 euros por empresa.
Lembrar que VíaVigo é
unha aceleradora de empresas e emprendedores deseñada polo Consorcio
da Zona Franca de Vigo que ten aberto o prazo de presentación de
ideas da súa segunda convocatoria e á que desde este venres súmase
a Xunta “para facilitar a creación de novas empresas que
diversifiquen o tecido produtivo da comarca”, explicouse. De feito,
dada esta nova participación de GAIN e XES Galicia, decidiuse dar
“máis facilidades” e ampliar o prazo de inscrición de proxectos
á segunda convocatoria de ViaVigo até o 31 de xullo.
Lembrar que na primeira
edición 131 ideas de negocio de todo tipo de sectores (aínda que os
proxectos TIC tiveron un presenza destacada, tal e como puidemos
comprobar) presentáronse á primeira escolma das que finalmente dez
xa están a piques de rematar a súa fase de aceleración “cun
nivel de satisfacción ben alto entre todas elas”.