Os titulados en informática, máis preto do consello asesor estatal en materia TIC
mércores, 7 de setembro do 2011
- Comisión xestora do CONCITI, reunida a comezos de 2010 en Madrid
Este luns 5 de setembro, a Comisión Permanente do
Consello Asesor das Telecomunicacións e a Sociedade da Información, tamén
coñecido como CATSI, decidiu dar vía libre á incorporación dos enxeñeiros e
enxeñeiros técnicos en Informática como membros de pleno dereito no Consello,
dependente do Goberno a través da Secretaría de Estado para as Telecomunicacións.
Esta apertura definitiva ás tituladas e titulados, cousa pola que estas e estes
viñan loitando dende hai anos, significará entre outras cousas unha meirande
participación dos profesionais e dos colexios que os representan no día a día
da Sociedade do Coñecemento en España.
Segundo sinalan os colexios das diferentes
comunidades autónomas e os consellos estatais que os agrupan (CONCITI e CCII),
un dos seus principais cometidos será colaborar, ombro con ombro co CATSI, na
mellora do afianzamento na sociedade española das redes e as diferentes
ferramentas de xestión, información e comunicación da era dixital. Ao seu xuízo,
con esta resolución da dita Comisión Permanente, vese cumprida unha das súas
grandes reivindicacións, tras ano e medio de espera a que se dera cumprimento á
Lei de creación dos dous consellos xerais. As dúas entidades aproveitaron a
ocasión para agradecerlle á Secretaría de Estado a modificación dos
regulamentos que impedían a concorrencia dos enxeñeiros no CATSI, amosándolle
ao mesmo tempo a súa total dispoñibilidade para impulsar, de maneira
definitiva, “o paso do cable aos
servizos, dun estado de cousas en que se actuamos como consumidores de
información a outro no que producimos, de xeito directo, coñecemento” .
Sinalar que o CONCITI conta con representación
galega a través do Colexio Profesional de Enxeñaría Técnica en Informática de
Galicia, o CPETIG, e que o CCII integra no seu seo ao Colexio Profesional de
Enxeñaría en Informática de Galicia, o CPEIG.