Os xornalistas rematan abril con 20 novos obradoiros sobre os segredos da comunicación tradicional e dixital
venres, 21 de abril do 2017
O Colexio de
Xornalistas de Galicia vai rematar o mes de abril cunha
“actividade frenética” de divulgación nos centros educativos.
Estamos a falar de vinte obradoiros a desenvolver en dez concellos de
toda Galicia, todos eles abeirados ao programa Xornalismo na Escola
que, como lembraremos, responde á vontade do devandito Colexio de
amosar aos nenos e adolescentes os segredos da profesión que
representa e mailos seus desafíos na comunicación dixital. Os
obradoiros mostrarán, entre outras cousas, como mudaron nos últimos
tempos os nosos hábitos informativos e até que punto se
transformou, co afianzamento das novas tecnoloxías, a profesión
xornalística (sen dúbida un dos traballos máis directamente
atinxidos polo espallamento da sociedade dixital).
A iniciativa, que vén da man do Colexio
Profesional de Xornalistas e a Obra Social La Caixa recala a semana
entrante na Coruña, Pontevedra, Ourense, Pontedeume, Marín, Ferrol,
Teo, Santiago de Compostela, Salceda de Caselas e Mugardos.
Datas e localizacións
O
luns 24 a semana comeza con obradoiros no IES Otero Pedrayo da Coruña
(en horario de 9:35 a 11:15 e de 12:35 a 14:15), no IES A Xunqueira 1
de Pontevedra (de 10:00 a 11.30 e de 16:30 a 18:00), no IES Eduardo
Blanco Amor de Ourense (entre as 10:30 e as 12:10) e no IES Fragas do
Eume de Pontedeume (de 12:30 a 14:10). O martes 25 os talleres
chegarán a Ferrol (de 10:30 a 12:10 no IES Ricardo Carballo Calero),
Marín (a partir das 11:30 no IES Illa de Tambo) e Teo (no IES de
Cacheiras, entre as 16:30 e as 18:10).
O
mércores 26 realizaranse novos obradoiros no IES Ricardo Carballo
Calero de Ferrol (de 12:30 a 14:00 horas) e no IES de Cacheiras, Teo
(entre as 12:45 e as 14:25), ademais de sumarse o IES Pontepedriña
de Santiago de Compostela, con dous talleres de 10:45 a 12:25 e de
12:45 a 14:25. Finalmente, o xoves 27 estreanse o IES de Mugardos
(con dous obradoiros de 8:45 a 10:25 e de 10:45 a12:25) e o IES
Pedras Rubias de Salceda de Caselas (con outros dous de 10:10 a 11:50
e de 12:20 a 14:00), ademais de novos talleres no IES Illa de Tambo
de Marín (de 8.30 a 11:00 e de 11:00 a 13:00 e o IES Eduardo Blanco
Amor de Ourense (de 12:30 a 14:10).
Preto
dun centenar de obradoiros
En
toda Galicia está programada a celebración de 90 obradoiros, cos
que se pretende chegar a uns 3.000 rapaces e rapazas. Ángel Castro,
Susana Bastón, Sara Martínez, Xosé Lois Carrión, Águeda Penedo,
Lucía Álvarez, Elvira Álvarez, Ángeles Fernández e Víctor
Sariego son os xornalistas que están
a
impartir os obradoiros.
Até
maio, axudarán
a que a xuventude coñeza o funcionamento dos medios de comunicación
e tratarán de estimular na mocidade o espírito crítico ante a
información e as noticias nos medios de comunicación offline
e online.
Deste xeito, os alumnos tratarán temas como os riscos e vantaxes das
novas Tecnoloxías
de Información
e a Comunicación
(TIC),
a necesidade da mediación e o contraste de fontes no xornalismo ou
tamén o que pode supoñer
para á xente nova a veracidade e o rigor xornalístico.
O
proxecto de Xornalismo na Escola, que se pode seguir en Twitter
baixo o
cancelo
#XornalismoNaEscola, é posíbel
grazas a un acordo acadado a finais de 2015 entre o Colexio de
Xornalistas de Galicia e a Obra Social La Caixa e que agora se renova
e amplía “cunha segunda edición máis ambiciosa”.