Ouvirmos amosa o miolo da súa actividade cultural na súa nova web
mércores, 6 de xuño do 2012
O selo tecnolóxico-cultural Ouvirmos vén de
presentar nova páxina web. O sitio, xa
dispoñíbel, xira agora, máis que nunca, arredor do seu servizo de blog, que desenvolve
un papel central “como xerador da
identidade dixital da empresa”. Máis polo miúdo, o que se pretende é
reforzar o papel da bitácora corporativa como canle de información de primeira
liña, unha canle que o cubre todo: dende a orixe da propia información até a súa
difusión por boletín vía mail, RSS ou
Facebook.
Con esta páxina remodelada, ademais de acceder
ao catálogo editorial completo do selo, poderemos coñecer tamén a súa
actividade como consultoría
cultural: exposicións, campañas e eventos cos que “se contribúe a innovar e dinamizar a realidade social”, informan os
responsábeis da empresa.
Por certo que Ouvirmos estivo hai pouco na
primeira liña da información galega dixital e cultural, ao ser o responsábel da
páxina coa que se está a conmemorar o centenario do nacemento de Celso Emilio
Ferreiro, celsoemilioferreiro.org.
A páxina foi desenvolvida por Ouvirmos para a
fundación que leva o nome do autor de Longa Noite de Pedra e a
Consellería de Cultura. Trátase dun sitio en tres linguas (galego, castelán e
inglés) proxectado e posto en marcha para “axudar a difundir a figura deste
grande poeta dentro e fóra de Galicia”, sinala Ouvirmos.