Patricia Argerey presenta a nova plataforma InnovaRede
xoves, 14 de decembro do 2023
A directora da Axencia Galega de Innovación,
Patricia Argerey, presentou na Cidade da Cultura, este 14 de decembro
a plataforma InnovaRede:
Rede do ecosistema galego de innovación, que sería, nas súas
palabras, “o primeiro punto de acceso ás capacidades de I+D+i de
Galicia”. O
obxectivo é dar visibilidade a estas capacidades e fomentar a
conexión entre os axentes do ecosistema galego de I+D+i.
Segundo engadiu Argerey, esta nova ferramenta
“nace para reforzar este ecosistema e seguir medrando a través da
conexión das capacidades dos centros de coñecemento (centros
tecnolóxicos, de investigación ou innovación, universidades e
outros axentes de coñecemento) coas necesidades das empresas”.
Tamén busca impulsar a colaboración entre os distintos axentes de
demanda e oferta tecnolóxica “dunha forma áxil, directa e aberta,
para acelerar o proceso de desenvolvemento tecnolóxico, valorizar o
coñecemento e que as pemes atopen os recursos e capacidades que
precisan para innovar”.
InnovaRede nace con información de 35 axentes de
I+D+i de Galicia e coa aspiración de seguir medrando. A plataforma
recolle unha síntese de información priorizada de cada un deles
sobre quen son, onde se atopan, como contactalos e a que se dedican.
En total, a ferramenta inclúe 750 patentes, 3.700 publicacións e
3.500 proxectos, que representa o coñecemento de maior utilidade
para as empresas.
O portal conta cun buscador na páxina de inicio
que permite facer buscas en toda a información recompilada e
categorizada en tecnoloxías de fácil comprensión, cadeas de valor,
palabras chave e códigos UNESCO, para cada axente e liña de I+D+i.
Inclúe a maiores unha sección privada onde,
dándose de alta, permite formular unha demanda tecnolóxica para a
que non se atopou resposta nas descricións actuais de InnovaRede, á
que se lle dará resposta consultando aos axentes ou dende a
Administración. Por último, a web nace en tres linguas (galego,
castelán e inglés) para facilitar a súa visibilidade fóra de
Galicia.
Patricia Argerey avanzou tamén os seguintes pasos
para que InnovaRede medre: convertela nun espazo para facilitar o uso
compartido de infraestruturas e equipamentos científicos; crear o
banco de patentes galegas e axudar a atopar a posibles usuarios ou
explotadores; e ser un escaparate das oportunidades para traballar en
Galicia no eido da I+D+i.
Argerey rematou convidando a todos os asistentes,
máis de douscentos axentes do ecosistema galego de I+D+i, a usar a
plataforma para fornecer o ecosistema e seguir medrando xuntos e
agradeceu a participación de todos as persoas e centros de
coñecemento que incorporaron información e fixeron achegas para
mellorar a plataforma.