Poesiagalega.com: nova comunidade web dedicada ás nosas letras

Galiza reborda de cartafoles de poesía que fican no silencio, ben por darse os seus autores contra o muro de pedra que é a precariedade do mercado editorial, ben porque aínda non atoparon o pulo que precisaban para dalos a coñecer. Co fin de gañarlle terreo ó silencio, un equipo de vates de Galiza vén de poñer en marcha Poesiagalega.com, unha web desenvolvida coa axuda da firma Entercom e que xorde (en termos dos seus propios responsables) “co obxectivo de ofrecer un espazo para que toda persoa que escriba poesía en Galicia poida publicar a súa obra de xeito gratuíto”. Alén diso, o sitio abrolla coma a semente dun futuro arquivo literario encamiñado a “reflectir o máis fondo da cultura galega”.
Segundo sinalan os administradores da web, o único que se nos pide para formar parte deste novo grupo literario en liña é encher o formulario de rexistro cos nosos datos persoais e logo inserir unha breve resención biográfica e, en caso de tela, bibliográfica. Outro dos puntos salientables da web é o seu apartado de poesía visual, un espazo onde se poden pendurar traballos de tipo gráfico. Asemade, tamén se anima ós internautas a achegar novas de interese e suxestións sobre a proposta. Visto en Chuza!