Ponteareas recreará virtualmente a celebración do Corpus e as alfombras florais
xoves, 7 de maio do 2020
Ante
a imposibilidade de desenvolver normalmente grandes festividades e
acontecementos durante esta primavera, os nosos concellos están a
envorcar esforzos en conseguir que a actividade siga viva nas redes.
É o caso do Concello de Ponteareas,
que puxo o foco no plano virtual ante a necesidade de dar seguimento
aos festexos do Corpus e das súas alfombras florais. Así, malia que
xa se anunciou que non se confeccionarán as tradicionais alfombras
nos rueiros, si que está previsto realizar diferentes actividades ao
abeiro dunha festividade que xa ten dous séculos de antigüidade.
Faranse a través das redes sociais e dos medios de comunicación. “A
nosa intención é que as alfombras cheguen a todas as partes do
mundo a través das redes”, sinalou o Concello.
O
alcalde Xosé Represas explicou que a celebración consistirá “nunha
recreación virtual”, sendo as novas tecnoloxías e as canles de
comunicación “a ferramenta para continuar co legado herdado dos e
das nosas maiores”. Trátase, dixo, “dun xeito tamén de render
homenaxe as e os alfombristas portadores desta tradición que
lograron que Ponteareas sexa uha referencia mundial en Patrimonio
Inmaterial”.
Nunha
reunión mantida cos e coas representantes dos e das alfombristas e
cos portavoces de tódolos grupos da Corporación acordouse realizar
unha campaña de difusión do Corpus Christi local utilizando as
redes sociais para continuar coa difusión “deste sinal de
identidade” e “chegar a tódolos recunchos do mundo con imaxes,
documentos e vídeos que deixen constancia da riqueza da nosa arte
efémera”.
O
alcalde de Ponteareas adiantou que o Concello asumirá de xeito
íntegro a edición dunha publicación que “non será igual á
tradicional revista Pregón pero que recollerá e promoverá
esta fonda tradición cun enfoque distinto adaptado ás novas
circunstancias”.
E
engadiu: “Volveremos ter unha reunión quince días antes de Corpus
para avaliar todas as posibilidades de difusión da festa e coñecer
tamén as previsións da crise sanitaria”.