Portos achegará un servizo para outorgar por vía online prazas de amarre
xoves, 8 de outubro do 2020
- Na imaxe o porto deportivo de Sada
A
entidade
autonómica Portos de Galicia anunciou a apertura, en datas
vindeiras, dun novo procedemento para outorgar por vía telemática
prazas de amarre náuticas. O servizo abranguerá as instalacións
que xestiona directamente o ente público e aquelas xestionadas a
través dunha concesión privada pero nas que o organismo portuario é
o encargado de adxudicar os amarres. O obxectivo de Portos é “dar
avances en Administración Electrónica” e máis “na
simplificación da tramitación administrativa”, buscando “prestar
un servizo máis cómodo e eficiente aos usuarios dos portos
autonómicos”.
A
resolución aprobada pola presidenta do ente público, Susana
Lenguas, entrará en vigor ao día seguinte da súa publicación no
Diario Oficial de Galicia e poderá ser consultada tamén na páxina
web do ente público. A entidade explicou que será de aplicación ás
instalacións menores, que dispoñen de prazas de pequena eslora –ata
oito metros- nas que unicamente se presta o servizo de amarre, e ás
instalacións de maior envergadura -portos deportivos- nas que se
prestan diversos servizos a través dunha empresa ou entidade
concesionaria.