Preparan a apertura de dúas novas tendas Amazon Go

Este ano Amazon abriu unha tenda piloto en Seattle de só 167 metros cadrados para experimentar con tecnoloxía que facilitaba un novo xeito de facer a compra na que podía prescindirse das liñas de caixas para pagar, xa que as cámaras e os sensores repartidos polo establecemento de Amazon Go rexistraban a cesta da compra para cobrar logo os produtos levados ao saír da tenda, coma se fixésemos a compra en liña.
Esta tecnoloxía aínda ten moito que evolucionar, resultando tamén de grande interese a análise do comportamento dos clientes ante a falta de interacción con outras persoas e incluso a ausencia de caixas de pagamento automático, facendo que a fricción da compra se reduza extraordinariamente.
Por iso non sorprende que Amazon xa estea a preparar novas tendas sen caixas, segundo puido transcender dun par de ofertas de traballo para establecementos Amazon Go en Chicago e San Francisco.
Aseguran que é posible que ao longo do ano cheguen a pór en funcionamento un total de media ducia de tendas Amazon Go nos EE.UU., pero polo momento non hai informacións oficiais sobre o calendario de apertura destes establecementos que contribúen a explorar fórmulas para o futuro xeito de facer a compra.