Prepárase para o seu arranque o proxecto da UVigo para eliminar a COVID con drons
xoves, 14 de maio do 2020
O proxecto liderado por investigadores
da Universidade de Vigo para desinfectar áreas de risco por COVID-19
co emprego de drons e dispersión de líquidos está xa pronto
para arrincar. Segundo informou
a UVigo, este 14 de maio os responsábeis da iniciativa mantiveron
unha xuntanza telemática con Francisco Conde, conselleiro de
Economía, e os impulsores dos outros sete proxectos innovadores
apoiados pola Axencia Galega de Innovación para plantar cara á
COVID-19 (seis deles promovidos por empresas galegas e dous máis
deseñados pola UVigo e a USC). A proposta da UVigo porá o foco en
desenvolver un sistema de información xeográfica a nivel galego e
unha metodoloxía que permita optimizar o uso de drons anti-COVID
nesta crise.
A iniciativa da Universidade de Vigo, financiada
con 55.000 euros pola Axencia Galega de Innovación da Xunta de
Galicia, é como dixemos unha das oito solucións elixidas, entre as
160 recibidas, na convocatoria feita pola Consellaría de Economía,
Emprego para o desenvolvemento de proxectos innovadores fronte á
pandemia.
O
seu investigador principal será Higinio González, profesor titular
da Escola de Enxeñaría Aeronáutica e do Espazo do Campus de
Ourense, completando o equipo os profesores Fermín Navarro, do mesmo
centro, e Joaquín Martínez, da Escola de Enxeñaría de Minas; e o
persoal investigador Luis Miguel González; Noelia Fariñas; Lorena
Docasar e Alejandro Gómez. O seu labor desenvolverase de xuño a
decembro de 2020.
O
seu primeiro reto será desenvolver un sistema de información
xeográfica a nivel galego que determine zonas na que se prevé unha
elevada afluencia de xente e son susceptibles de desinfección con
drones.
O
segundo desafío será determinar horas necesarias de operación e
restricións de índole legal para esta desinfección, así como
recursos necesarios a nivel económico, de equipos e empresas
operadoras.
O
terceiro obxectivo será crear e verificar de metodoloxías de
desinfección específicas para estes sistemas para garantir o seu
correcto resultado.
Respecto
do primeiro punto (o desenvolvemento dun sistema de información
xeográfica a nivel galego que integre todas as zonas de
aplicabilidade da tecnoloxía de desinfección con drons e que
presente os lugares de potencial afluencia de xente que poderían á
súa vez ser desinfectados por este método), comezará por
determinar a área sobre a que actuar e por integrar no sistema as
restricións legais de voo existentes e definir diferentes tipos de
operacións en función disto. Para a xeración de metodoloxías de
operación específicas para a desinfección, así como a
verificación das mesmas, o proxecto parte do extenso coñecemento
que ten o equipo de traballo na operación de diferentes tipos de
sistemas non tripulados, xa que está integrado por tres pilotos de
drons, dous doutores enxeñeiros aeronáuticos e unha graduada en
Enxeñaría Aeroespacial.
A
intención é de que en setembro de 2020 poidan arrancar as primeiras
tarefas de desinfección con drons acompañando o inicio de
actividades como o curso escolar ou ligas deportivas. “Nese momento
arrancaríanse as actividades de verificación nas primeiras
operacións, que actuarían a modo de piloto e que se poderían
estender a partir de novembro a todo o territorio”, apunta
González.