Presentada a Estratexia Nacional de Intelixencia Artificial nun acto organizado polo CiTIUS
xoves, 18 de febreiro do 2021
Carme
Artigas Brugal, secretaria de Estado de Dixitalización e
Intelixencia Artificial, presentou este mércores 17 os detalles da
ENIA (Estratexia Nacional de Intelixencia Artificial), iniciativa do
Goberno de España para aproveitar as oportunidades de transformación
socioeconómica que brindan as máquinas e os sistemas con capacidade
para comunicarse e avaliar e comprender grandes cantidades de
información, amais de tomar decisións. Fíxoo
ao longo dun evento dixital organizado no CiTIUS (Centro Singular de
Investigación en Tecnoloxías Intelixentes da USC).
A
nova Estratexia Nacional de Intelixencia Artificial (ENIA), unha
iniciativa anunciada en decembro polo presidente do Goberno, Pedro
Sánchez, conta cun investimento público de 600 millóns de euros
para o período 2021-2023, e constitúe unha das propostas
fundamentais do Plan España Dixital 2025, lanzado o pasado mes de
xullo.
Tras
unha breve introdución do reitor da Universidade de Santiago,
Antonio López, e o director científico do CiTIUS, Senén Barro,
Artigas desvelou algunhas das claves desta nova estratexia, coa que o
Executivo pretende aliñar as políticas nacionais destinadas a
fomentar o desenvolvemento e o uso da IA en España.
Ao
longo da súa intervención, salientou o traballo das universidades e
os centros de investigación, cuxo labor cualificou de “absolutamente
indispensábel”. Ao fío disto, anunciou o seu apoio á creación
dun novo Grao de Intelixencia Artificial na USC, e lembrou que o
obxectivo é “seguir traballando de maneira conxunta de face ao
futuro, fortalecendo así mesmo a colaboración entre os sectores
público e privado”.
Como
exemplo desta colaboración, anunciou que o Goberno promoverá a
creación dunha Rede de Excelencia en Intelixencia Artificial cuxa
convocatoria lanzarase nos próximos dous ou tres meses.
Carme
Artigas incidiu tamén na necesidade de aproveitar a oportunidade
histórica que ofrece a Intenlixencia Artificial (IA) para
“reconstruír a economía sen deixar a ninguén atrás, pechando
brechas históricas”.
Tras
o encontro, ao que se uniron máis de duascentas persoas de múltiples
puntos de España, os asistentes tiveron a oportunidade de participar
nun debate coa secretaria de Estado, que respondeu a algunhas das
dúbidas dos diferentes perfís representados, desde universidades e
centros de investigación até profesionais e directivos de empresas,
tanto de startups como grandes empresas, técnicos e altos
cargos das administracións.