Presentado en Santiago un libro que avalía a fondo a crise do xornalismo na era das redes sociais
venres, 23 de novembro do 2012
A Fundación
Telefónica presentou esta semana en Santiago a obra O
xornalista na encrucillada (El Periodista en la
encrucijada, no seu título orixinal), un traballo que avalía a
situación actual da profesión nun intre especialmente complexo para
o seu mantemento e para o seu futuro, sendo a faciana máis grave
deste proceso os milleiros de despedimentos que se están a
materializar nunha chea de medios tradicionais, ou non tan
tradicionais, ben sexa por mor do cambio comunicativo que imprimen as
redes, ben sexa por unha mala xestión nos ditos medios ou por todo á
vez. O libro, que se presentou no auditorio da Facultade de Ciencias
de Comunicación, reflicte que o xornalista de hoxe está sometido “a
unha multitarefa improdutiva que lle impide contrastar e
contextualizar a información como debería para ofrecer un produto
de calidade e que é consecuencia da escaseza de tempo e de recursos
derivados da filosofía de curto prazo da empresa mediática”.
O acto de presentación
da obra -que forma parte da Colección Fundación Telefónica/Ariel e
é froito dunha investigación realizada polo grupo PASSET, da
Universidade Carlos III- contou coa presenza do director de
Coordinación Territorial da Fundación Telefónica, Joan Cruz; o
decano do Colexio Profesional de Xornalistas de Galicia, Xosé Manuel
Pereiro; e a profesora da Universidade Carlos III e coordinadora do
volume, Mª Pilar Diezhandino. Nas verbas desta última, a profesión
xornalística “atravesa un dos intres máis críticos da súa
historia”. Pola súa banda, Xosé Manuel Pereiro explicou que
o xornalismo “segue sendo unha profesión artesá, e a valía do
produto depende da calidade de quen o faga, dos medios de que dispoña
e do tempo que teña para facelo”. Asemade, tratouse o tema do
gratis total, unha estratexia seguida por moitos medios na Rede, o
que a xuízo dos presentes xa non é viábel (por outra banda, tamén
se ten demostrado a inviabilidade do contrario en certos casos, tal e como se viu coa experiencia de El País, que viu como se reducían de
xeito drástico as súas visitas ao impoñer o pago dunha cota). No
acto fíxose saber que a información tradicional teno complicado
perante a proliferación de redes, contidos e linguaxes máis acaídas
para as novas xeracións. Así, “fronte aos máis de 6.000
xornais que se editan no mundo, cada minuto descárganse de balde, en
YouTube, 48 horas de vídeos, cunha media de 3.000 millóns de
visualizacións diaria”. Asemade, en España, con dous millóns
e medio de blogs abertos, continúa a medrar o número de lectores
exclusivos do formato electrónico na Rede fronte aos lectores do
formato impreso. Esta tendencia, segundo se di no libro, revela a
necesidade dun cambio no modelo de negocio das máis de cen
cabeceiras españolas. O informe expón, ademais, que prevalecerá o
bo xornalismo cando se resolva o problema das súas fontes de
ingresos.