Presentado un percorrido literario e virtual por Compostela con motivo do Día da Biblioteca
mércores, 24 de outubro do 2012
Entre as
actividades que se desenvolven este mércores 24 de outubro, dende a
nosa terra, para conmemorar o Día
da Biblioteca, incluíuse un percorrido virtual pola frutífera e
intensa relación de Santiago coa nosa tradición narrativa. A
iniciativa, que vén da man da Biblioteca Pública Ánxel Casal, está
xa dispoñíbel no portal web da Rede de Bibliotecas de Galicia. Roteiros literarios por
Compostela, informa a
Consellería de Cultura,
é o nome deste proxecto “que convida a cidadanía a ler en
galego, ao tempo que amosa a cidade compostelá a través de anacos
de obras de referencia da novela negra en galego que teñen como
escenario a capital de Galicia”.
A iniciativa foi
presentada este mércores polo secretario xeral de Cultura, Anxo
Lorenzo, no marco da celebración do Día da Biblioteca e nun acto no
que estivo acompañado pola directora da biblioteca, Carina
Fernández, e máis por Antonio José Rodríguez, representante da
empresa Imasv, que desenvolveu a aplicación.
Na súa
intervención, o secretario xeral destacou a necesidade de contarmos
con “novas doses de imaxinación para achegarlle os libros á
sociedade” e nesta liña de dinamización situou a creación
desta “nova ferramenta, que nos convida á lectura en galego e
que pon a biblioteca en relación cos escenarios da súa cidade, nos
que se desenvolven as intrigas de varios títulos de referencia da
novela negra galega”.
Os textos que
guían a visita virtual por algunhas das rúas, prazas e parques da
capital de Galicia recrean un total de once espazos descritos en
cinco obras estreitamente vinculadas ao xénero da novela negra en
galego ou á narrativa de intriga. Estas obras son Crime en
Compostela, de Carlos G. Reigosa; Ambulancia, de Suso de
Toro; Asasinato no Consello Nacional, de Diego
Ameixeiras; O crime da rúa da Moeda Vella, de Román Raña; e
Seis cordas e un corazón, de Roque Morteiro.
Para a visita
virtual, informouse, “emprégase a aplicación de Google
Maps, e entre a ducia de lugares referidos inclúense a
rúa Nova, a do Hórreo o a da Carreira do Conde; a praza do Toural e
das Praterías ou o Parque de San Domingos de Bonaval”.
- O Parque de Bonaval é un dos emprazamentos incluídos no roteiro