Presentan no Barco o portal de venda en liña do comercio galego
xoves, 1 de marzo do 2012
A directora
xeral de Comercio, Nava
Castro, participou esta tarde no Barco de Valdeorras na presentación nesta vila
do portal de comercio electrónico comerciogalicia.es, unha plataforma posta
en marcha en colaboración pola Consellería de Economía e Industria e a
Federación Galega de Comercio.
Nava Castro
salientou que a posta en marcha de comerciogalicia.es permite aos comerciantes
galegos “ofrecer novos e mellores
servizos aos consumidores e combinar a súa actividade comercial tradicional coa
venda a través de internet” e animou aos comerciantes da zona a sumarse a
esta iniciativa “que non só lles
posibilitará abrirse a novos mercados senón tamén ofrecer novos servizos á
clientela que xa confía neles no día a día”.
O portal,
que permitirá ao sector ofrecer un escaparate conxunto para a venda a través de
internet, ofrece servizos de envío e de pagos unificados, así como vantaxes
como a venda por lotes, permitindo mercar en distintas tendas cunha soa
transacción económica.
Castro
recordou que “o impulso á modernización e
dinamización do comercio de proximidade é un dos eixos estratéxicos da
actuación de Consellería de Economía e Industria” e lembrou que o
departamento que dirixe Javier Guerra “ten
en marcha un plan integral onde se plasma a estratexia comercial da Xunta: o
Plan Ágora- Agora recomercia”.